నమో:కే పట్టం కట్టిన కమలనాధులు

Posted: 09/14/2013 09:24 AM IST

2014 లో భారత ప్రధాని అభ్యర్థి బీజేపీ తరుపున ఎవరు నియమితులు కాబోతున్నారు ? ఈ ప్రశ్నకు గత కొన్ని రోజులుగా సమాధానం దొరకడం లేదు. బీజేపీ అగ్రనాయకత్వంలో దాదాపు అందరు మోడీ వైపే వేలు చూపిస్తుంటే, అగ్రనేత అద్వానీ బ్రేకులు వేస్తూ వచ్చారు. కానీ ఎట్టకేలకు బీజేపీ ప్రధాని అభ్యర్థిని పార్టీ ప్రకటించింది. అద్వానీ అలక బూనినా అతన్ని ఏమాత్రం లెక్కచేయకుండా అగ్రనేతలు అంతా నమో: కే జై కొట్టారు. ఈ అంశంలో కొద్దినెలలుగా నెలకొన్న ఉత్కంఠకు తెరపడింది. పార్టీ పార్లమెంటరీ బోర్డు సమావేశం అనంతరం మోడీని ప్రధాని అభ్యర్థిగా ఎంపిక చేసినట్లు బీజేపీ అధ్యక్షుడు రాజ్‌నాథ్ సింగ్ శుక్రవారం ప్రకటించారు. దీంతో భారతీయ జనతాపార్టీలో నవశకం... అది ‘నరేంద్ర మోదీ శకం ’ ప్రారంభమైంది. ఇప్పటికే పార్టీ ఎన్నికల ప్రచార సారథిగా నియమితుడైన మోదీ... ఇప్పుడు ‘బీజేపీ ప్రధాన మంత్రి అభ్యర్థి ’ గా నియమితులైయ్యారు. మోడీ రాకతో అద్వానీ శకం ముగిసినట్లయింది. పన్నెండు మంది సభ్యులు గల బీజేపీ పార్లమెంటరీ బోర్డు భేటీకి మోడీపై కినుక వహించిన అద్వానీ మినహా మిగిలిన నేతలందరూ హాజరయ్యారు. సుష్మా స్వరాజ్, మురళీమనోహర్ జోషీ, అరుణ్ జైట్లీ, నితిన్ గడ్కారీ తదితర సీనియర్ నేతలు సహా ఈ సమావేశంలో పాల్గొన్నారు.

అద్వానీని సమావేశానికి రప్పించేందుకు సీనియర్ నేతలు చివరి నిమిషం వరకు ఎంతగా ప్రయ త్నించినా ఫలితం లేకపోయింది. ఇక ప్రధాని అభ్యర్థిగా మోడీ ఎన్నికైన తరువాత పార్టీ అగ్రనేతలందరికీ తన ధన్యవాదాలు తెలిపారు. మోడీ నియామకానికి బ్రేకులు వేస్తూ వస్తున్న అద్వానీని తన రాజకీయ గురువుగా చెప్పుకుంటున్న  మోడీ ఆయన ఇంటికి ఆశీస్సులు తీసుకున్నారు. మోడీ ఆశీస్సులు తమకు ఎప్పటికి ఉంటాయని, ఆయన సూత్రాలను తూ.చ. తప్పకుండా పాటిస్తానని మోడీ చెప్పుకొచ్చారు. ఇక పార్టీ బలోపేతానికి తనవంతు క్రుషి చేస్తానని మోడీ చెప్పుకొచ్చారు.