మోడీకి అద్వానీ రెడ్ సిగ్నల్

Posted: 09/12/2013 11:57 AM IST

‘దేవుడు వరం ఇచ్చినా, పూజారి వరం ఇవ్వనట్లు ’ దేశంలో అంత్యంత ప్రజాధరణ ఉన్న నాయకుడు, భారతీయ జనతా పార్టీ ఎన్నికల ప్రచార కమిటీ సారథి, గుజరాత్ ముఖ్యమంత్రి నరేంద్ర మోడీని ప్రధాని అభ్యర్థిగా ప్రకటించాలని ఆర్ఎస్ఎస్ పెద్దలు గట్టిగా సూచిస్తున్నా బీజేపీ అగ్రనేత ఎల్.కె. అద్వానీ మాత్రం గ్రీన్ సిగ్నల్ ఇవ్వడం లేదు. పార్టీ అగ్రనేత అయిన అద్వానినీ ఒప్పుంచేందుకు బీజేపీ అధ్యక్షుడు రాజ్ నాథ్ సింగ్ స్వయాన రంగంలో దిగినా కానీ ఫలితం లేకపోయింది. 2014 ఎన్నికలు సమీపిస్తుండటంతో పార్టీ ప్రధాని అభ్యర్థిని ప్రకటించాలని ఆర్ఎస్ఎస్ పెద్దలు చూస్తున్నా కానీ అద్వానీ బెట్టు వీడటం లేదు. ఇటు రాజ్ నాథ్ సింగ్, అటు నితిన్ గడ్కరీ అద్వానీతో జరిపిన చర్చలు  విఫలం కావడంతో బీజేపీ అత్యున్నత నిర్ణాయక విభాగమైన పార్లమెంటరీ బోర్డు సమావేశం భేటీపై సందేహాలు ముసురుకున్నాయి. ఈ ఏడాది ఆఖరులో జరిగే ఐదు రాష్ట్రాల అసెంబ్లీ ఎన్నికలదాకా ఆగాలని సంఘ్ పరివార్ నేతలతో భేటీలోనే ఆడ్వాణీ సూచించారు. మధ్యప్రదేశ్ సీఎం శివరాజ్ సింగ్ చౌహాన్ కూడా ఈ ప్రతిపాదనను సమర్థిస్తున్నారు. అయితే భేటీ ఎప్పుడు జరగాలన్నది అగ్ర నేత హోదాలో అద్వానీయే నిర్ణయించవచ్చని, అంతే తప్ప మోడీని ప్రధాని అభ్యర్థిగా ప్రకటించడంపై ఇంకెంత మాత్రమూ ఆలస్యం జరగరాదని, అలా జరిగితే 2014లో బీజేపీ విజయావకాశాలు దెబ్బతింటాయని పలువురు నేతలు అభిప్రాయ పడుతున్నారు. మరి అద్వానీ కరుణించేసరికి ఉన్న పుణ్యకాలం కాస్త గడిచిపోతుందేమో ?