బాబులో అనుమానం

Posted: 09/10/2013 11:27 AM IST

ఆరు నూరైనా అధికారం మాదేనని టిడిపి అదినేత చంద్రబాబు ఆవేశంగా అన్నారు. చంద్రబాబు కృష్ణాజిల్లాలో బస్ యాత్ర సాగిస్తున్నారు. వై.ఎస్.ఆర్.కాంగ్రెస్ దోపిడీ దొంగల పార్టీ అని చంద్రబాబు నాయుడు విమర్శించారు. ఈసారి టిడిపి అధికారంలోకి రావడాన్ని ఎవరూ ఆపలేరని ఆయన విశ్వాసం వ్యక్తం చేశారు. రాష్ట్రాన్ని కాంగ్రెస్ నాశనం చేసిందని ఆయన ధ్వజమెత్తారు. ఇటలీ బొమ్మని పట్టుకొని మన కాంగ్రెస్ నాయకులు అమ్మ అని సంబోదిస్తున్నారని...ఈ నాయకులు కన్నతల్లిని కూడా అంత ఆప్యాయంగా పిలిచి ఉండరేమో అని బాబు అనుమానం వ్యక్తం చేసారు. కాంగ్రెస్ పార్టీని ఓడించడానికి తెలుగుదేశంతో కలిసి రావాలని ఆయన కోరారు. చంద్రబాబు నాయుడు తన పర్యటనలో ఎక్కువ భాగం కాంగ్రెస్, వై.ఎస్.ఆర్.కాంగ్రెస్ లను విమర్శించడానికే సమయం కేటాయిస్తున్నారు. నిజానికి ఆయన సీమాంద్ర ప్రజల ఆందోళనకు మద్దతు పలకడానికి గాను పర్యటన చేస్తున్నారు. ఆ సందర్భంలో ఆయన రాష్ట్రం సమైక్యంగా ఉండాలా? వద్దా అన్నదానిపై నేరుగా మాట్లాడలేని పరిస్థితి ఉంది. ఈ నేపధ్యంలో చంద్రబాబు కాంగ్రెస్ ను, సోనియాగాంధీని, వై.ఎస్.ఆర్.కాంగ్రెస్ ను, టిఆర్ఎస్ ను ,ఈ మూడు పార్టీ లు రాష్ట్రాన్ని భ్రష్టు పట్టించడానికి కుట్ర చేస్తున్నాయని ఆరోపిస్తూ ఒక రకంగా ఆరు నెలల ముందుగానే ఎన్నికల ప్రచారం చేస్తున్నారు. ఆయా సందర్భాలలో విభజన, సమైక్యం సమస్యలపై ప్రస్తావిస్తున్నా, ఆయన ప్రధానంగా వై.ఎస్.ఆర్.కాంగ్రెస్ ను లక్ష్యంగా చేసుకుని విమర్శల వర్షం కురిపిస్తున్నారు.