క్యాన్సర్ ని సమూలంగా తీసేసే వేప

Posted: 07/11/2013 09:40 AM IST

వేప చెట్టు ఇంట్లో ఉంటే మంచిదని పెద్దలు చెప్తుండేవారు.  వేప ఆకుల వలన క్రిమిసంహారం జరుగుతుందని వేప మండలను గుమ్మాలకు కట్టేవారు.  వేప రసం తాగితే చక్కెర వ్యాధి నియంత్రణలో ఉంటుందని రోజూ తాగేవారున్నారు.  చర్మవ్యాధులకు వేపాకు రసంతోకూడిన పిండిని పట్టించి నలుగు పెట్టుకుంటారు.  ప్రసవం తర్వాత మొదటిసారిగా చేయించే స్నానానికి పెట్టిన వేడి నీళ్ళల్లో వేపాకులు వేస్తారు.  ఆటలమ్మ, మసూచికంలాంటి ప్రాణాంతక రుగ్మతలనుంచి కూడా మానవాళిని కాపాడింది వేపే.  వేప పూవు లేకుండా మన ఉగాది ప్రారంభమే కాదు.  ఇలా వేపలోని ఔషధ గుణాలను మనం శతాబ్దాలుగా ఉపయోగించుకుంటూ వస్తున్నాం. 

అవన్నీ పాత ఆచారాలంటూ కొట్టిపారేస్తూ రసాయనాలతో కూడిన ఖరీదైన ప్రత్యామ్నాయాలకు పోయే వారు అదే వేప చెట్టుని ప్రయోగశాలల్లో విజ్ఞాన శాస్త్రవేత్తలు చెప్తే మాత్రం ఔనా అంటూ విస్తుపోవటమే కాకుండా దాన్ని వెంటనే నమ్మి పాటిస్తారు. 

కోల్ కతా లోని చిత్తరంజన్ నేషనల్ క్యాన్సర్ ఇన్స్ స్టిట్యూట్ లోని కొందరు పరిశోధకులు వేప గుణాల మీద అధ్యయనం చేసి వేపాకులోని గ్లైకోప్రొటీన్ జీవకణాలను నియంత్రణలో తోడ్పడతాయని తెలుసుకున్నారు.  అంటే క్యాన్సర్ ని అరికడుతుందన్నమాట.  అయితే విచిత్రమేమిటంటే ఈ ప్రొటీన్ క్యాన్సర్ కణాల జోలికి పోకుండా, కణితి లోపల ఉండే కణాలను ఉత్తేజపరచి అందులో రోగనిరోధక శక్తిని నింపుతుంది.  దానితోపాటుగా కణితి చుట్టూ ఉండే కణాలలోని శక్తిని పెంచి క్యాన్సర్ ని నిర్వీర్యం చేస్తుంది. 

అంటే, సాధారణమైన వైద్య ప్రక్రియ కాదది.  క్యాన్సర్ మూలంలోకి పోయి నయం చేసే అత్యుత్తమమైన ఔషధమన్నమాట వేప లోని గ్లైకోప్రొటీన్.  దీన్ని పెంపొందించి వైద్యానికి ఉపయోగించగలిగితే మాత్రం క్యాన్సర్ ని దీటుగా ఎదుర్కున్నట్లే.  ప్రస్తుతం క్యాన్సర్ కణాలను శరీరం నుంచి తొలగించి ఆ అవలక్షణం మిగిలిన కణాలలోకి పాకకుండా జాగ్రత్త పడటమే మనం చేస్తున్నాం కానీ, కణవ్యవస్థలోపంతో కణితిగా ఏర్పడే కణాలను బాగుచెయ్యటమనే విధానం ఇంతవరకూ రాలేదు.  ఆ గుణం వేపలో ఉండటం వైద్యపరంగా చాలా మంచి వార్త.  కానీ దీన్ని వైద్యోపచారానికి ఉపయోగపడేవిధంగా ఉత్పాదనలు తయారు చేసి వాడకంకోసం వ్యాపారరీత్యా సన్నిద్ధం చెయ్యటానికి ఇంకా చాలా కాలం పట్టవచ్చు.  అయినా ఇది శుభారంభమే కదా. 

-శ్రీజ