ప్రజాస్వామ్యం మీద ప్రతిఘటన

Posted: 05/26/2013 11:13 AM IST

నిన్న సాయంత్రం ఛత్తీస్ ఘడ్ లో మావోయిస్ట్ లు దర్భా ప్రాంతంలో దారికాసి కాంగ్రెస్ నాయకులు, కార్యకర్తలు, భద్రతా దళాల మీద మందు పాతరలతోనూ, విచక్షణా రహితమైన కాల్పులతోనూ దాడి చేసి 27 మందిని హతమార్చారు, 32 మందిని గాయపరిచారు.  గాలింపి చర్యలు ఇంకా జరుగుతుండటం వలన జరిగిన మొత్తం నష్టం ఇంకా తెలియరాలేదు. 

మావోయిస్ట్ ల చర్యలను అరికట్టటానికి సల్వా జుడుమ్ సంస్థను స్థాపించి నడిపించిన కాంగ్రెస్ గిరిజన నాయకుడు మహేంద్ర కర్మా, కాంగ్రెస్ సీనియర్ నాయకుడు ఉదయ్ మొదలియార్ కాల్పుల్లో మరణించారు.  ఛత్తీస్ ఘడ్ కాంగ్రెస్ పార్టీ అధ్యక్షుడు నంద కుమార్ పాటేల్ ఆయన కుమారుడిని నక్సల్ కి బందీలుగా తీసుకెళ్ళారు.  రాత్రి పూట గాలింపు చర్యలను కొనసాగించలేని పరిస్థితి నెలకొంది.  దానితో ఉదయం నుంచి సాగించిన గాలింపులలో వారిద్దరూ మరణించినట్టుగా తెలిసింది.

సీనియర్ నాయకులు విద్యా చరణ్ శుక్లా, కోంటా శాసన సభ్యుడు కవాసీ లఖ్మా గాయపడ్డారు.

పరివర్తన యాత్ర లో భాగంగా ఛత్తీస్ ఘడ్ లో సుకుమాలో జరిగిన ర్యాలీ తర్వాత జగ్దల్ పుర్ కి తిరిగి వస్తుండగా దర్భా దగ్గర దారికాసిన నక్సల్స్ పథకం ప్రకారం చెట్లను నరికి, ట్రక్ ని అడ్డంగా పెట్టి దారిని అడ్డగించి, మందుపాతరతో కాన్వాయ్ లోని రెండు మూడు వాహనాలను పేల్చి, వెనువెంటనే సాయుధ దళాలతో చుట్టుముట్టి విచక్షణారహితంగా కాల్పులు జరిపారు.

ఘటనా స్థలికి చేరుకున్న అఖిల భారత కాంగ్రెస్ ఉపాధ్యక్షుడు రాహుల్ గాంధీ ఈ చర్యను కాంగ్రెస్ పార్టీ మీద కాదు, ప్రజాస్వామ్యం మీదనే జరిగిన దాడిగా పేర్కొన్నారు.  వార్త వినగానే దిగ్భ్రాంతి చెందిన అఖిల భారత కాంగ్రెస్ పార్టీ ప్రెసిడెంట్ సోనియా గాంధీ, ప్రధాన మంత్రి మన్మోహన్ సింగ్ ఘటనా స్థలికి వెళ్ళటానికి సన్నిద్ధమయ్యారు. 

గాయపడినవారిని హెలికాప్టర్ ద్వారా రాయపూర్ కి తరలించి వైద్య చికిత్సలు చేస్తున్నారు.  దేశంలోని నాయకులంతా పార్టీలతో నిమిత్తం లేకుండా ఈ ఘటనను పూర్తి స్థాయిలో ఖండించారు. 

-శ్రీజ