రెండు రోజుల కస్టడీ..?

Posted: 05/27/2013 11:24 AM IST

స్పాట్ ఫిక్సింగ్‌లో అరెస్టయిన రాజస్థాన్ రాయల్స్ క్రికెటర్లు శ్రీశాంత్, అజిత్ చండీలాకు మరో రెండు రోజుల పోలీస్ కస్టడీకి మెట్రోపాలిటన్ మెజిస్ట్రేట్ అనూజ్ అగర్వాల్ అనుమతించారు. వీరిద్దరితోపాటు, బుకీలు చంద్రేష్ పటేల్, అశ్వనీ అలియాస్ టిపూలను కూడా ప్రశ్నించడానికి వీలుగా ఈనెల 28వ తేదీ వరకూ తమ కస్టడీలో ఉంచాలన్న పోలీస్ అధికారుల విజ్ఞప్తికి న్యాయమూర్తి సానుకూలంగా స్పందించారు. అదే విధంగా ఈ కేసులో అరెస్టయిన మరో రాజస్థాన్ రాయల్స్ ఆటగాడు అంకిత్ చవాన్, మాజీ రంజీ క్రికెటర్ బాబూరావు యాదవ్, బుకీలు జిజూ జనార్ధన్, దీపక్ కుమార్, మానన్ భట్‌లను జూన్ నాలుగో తేదీ వరకూ జ్యుడిషియల్ కస్టడీకి అప్పగించారు.

తాను నిర్దోషినని, పోలీసులు తనపై అక్రమంగా కేసు బనాయించారని ఆరోపిస్తూ, శ్రీశాంత్ బెయిల్ పిటిషన్ దాఖలు చేయగా, జూన్ రెండో తేదీన తన వివాహం జరగనుందని, కాబట్టి తనకు బెయిల్ ఇప్పించాలని న్యాయమూర్తిని చవాన్ కోరాడు. వీరిద్దరి బెయిల్ పిటిషన్లను ఈనెల 28వ తేదీన విచారణకు స్వీకరిస్తామని న్యాయమూర్తి ప్రకటించారు. ఢిల్లీ పోలీస్‌లు ఇప్పటి వరకూ మొత్తం 19 మందిని అదుపులోకి తీసుకున్నారు. తాజాగా మరో ముగ్గురు బుకీల వేటలో తలమునకలయ్యారు. బుకీ మహమ్మద్ యాహ్యా ఇచ్చిన సమాచారం ప్రకారం, ఐపిఎల్‌లోని మరో ఫ్రాంచైజీకి చెందిన మరో ముగ్గురు క్రికెటర్లకు స్పాట్ ఫిక్సింగ్‌లో సంబంధం ఉందని ఢిల్లీ పోలీస్ ఉన్నతాధికారి ఒకరు పిటిఐకి చెప్పాడు. అయితే,

ఆ ఫ్రాంచైజీ పేరునుగానీ, ఆటగాళ్ల వివరాలనుగానీ వెల్లడించడానికి నిరాకరించాడు. యాహ్యా ఇచ్చిన సమాచారం ఆధారంగా మరో ముగ్గురు బుకీల ఆచూకీ కోసం వేట కొనసాగిస్తున్నట్టు చెప్పాడు. వారిని అదుపులోకి తీసుకుంటే, తాజాగా వెలుగులోకి వచ్చిన మరో ముగ్గురు క్రికెటర్ల పాత్ర గురించిన సమాచారం తెలుస్తుందని అన్నాడు. విదేశీ క్రికెటర్లలో ఎవరూ స్పాట్ ఫిక్సింగ్‌కు పాల్పడినట్టు సమాచారం ఏదీ ప్రస్తుతానికి తమ వద్దలేదని చెప్పాడు. అయితే, విదేశీ ఆటగాళ్ల పాత్రను పూర్తిగా కొట్టేయడానికి వీలులేదని, ఎవరు ఫిక్సింగ్‌కు పాల్పడ్డారో సమగ్ర సమాచారం సేకరించడానికి మరికొంత సమయం పడుతుందన్నాడు.