Posted: 03/16/2013 05:15 PM IST

ఆన్ లైన్ మాగజైన్ కోబ్రా పోస్ట్ భారత దేశంలోని ప్రైవేటు బ్యాంకుల మీద చేసిన స్టింగ్ ఆపరేషన్ లో తేలిన విషయాలను బయటపెట్టేటప్పటికి ప్రైవేటు బ్యాంక్ లన్నీ ఆత్మరక్షణలో పడిపోయాయి.  కోబ్రా పోస్ట్ వెల్లడి చేసిన విషయాలు ఇవి-

ప్రైవేటు బ్యాంకుల ఉద్యోగులు దేశంలోని పలు శాఖల ద్వారా అర్ధిక రంగంలో అవినీతికి పాల్పడుతున్నారు.  వారిలో ఐసిఐసిఐ బ్యాంక్, హెచ్ డి ఎఫ్ సి బ్యాంక్, యాక్సిస్ బ్యాంకు ఉద్యోగులున్నారు.  బ్యాంకు ఉద్యోగులు నల్లధనాన్ని తెలుపులోకి మార్చటానికి ఏవిధంగా సాయపడుతున్నారో వివరంగా చెప్పారు.  బ్యాంకులు, ఇన్సూరెన్స్ లింకు ఉన్నవి ఏ విధంగా అవినీతికోరులకు సాయపడుతున్నాయన్నది చెప్తూ, దానికోసం పాత వినియోగదారుడే అవనక్కరలేదు, అప్పుడే బ్యాంకులోకి అడుగుపెట్టిన వాళ్ళు కూడా ఈ సేవలను ఎలా అందుకుంటున్నారన్న వివరణ ఉంది.

దానితో ముందుగా స్పందించిన ఐసిఐసిఐ బ్యాంక్ 18 మంది ఉద్యోగులను సస్పెండ్ చేసింది.  హెచ్ డి ఎఫ్ సి బ్యాంక్ ఈ విషయంలో తరచి చూడటం కోసం ఆడిటర్లను, స్వతంత్రంగా పనిచేసే ఫోరెన్సిక్ నిపుణలను రంగంలోకి దింపింది.  అంతర్గత దర్యాప్తు జరుగుతోందని, 16 మంది ఉద్యోగుల మీద నిఘా ఉంచామని యాక్సిస్ బ్యాంక్ చెప్తోంది.  ఇక కోటక్ మహీంద్రా బ్యాంక్ తమ బ్యాంక్ లలో నల్లధనం తో లావాదేవీలేవీ జరగలేదని అంటోంది.

-శ్రీజ