Posted: 12/30/2012 10:56 AM IST

నగ్మా ఒకప్పుడు తెలుగు ప్రేక్షకులు ఈ పేరు వినగానే నరాలు జివ్వుమనేవి. తెలుగులో మంచి హిట్ చిత్రాల్లో నటించి ప్రేక్షకుల మన్ననలు పొందిన ఈమెను ఆ తరం వారు అంత ఈజీగా మరచిపోరు. ఇక ఈమె గత కొన్ని సంవత్సరాల క్రితం నుండి సినిమాల్లో కనిపించడం లేదు. సినిమాల్లో తన అంకం ముగిసిన తరువాత రాజకీయల్లో కొత్త ఇన్నింగ్స్ మొదలు పెట్టిన నగ్మా కాంగ్రెస్ పార్టీలో కొనసాగుతుంది. అయితే ఈమె గతంలోనే రాజకీయ అరంగ్రేటం చేయబోతుందని, 2009లోనే లోక్ సభ అభ్యర్థిగా భరిలో దిగుతుందని ప్రచారం సాగినా అది జరగలేదు. ఇప్పడు మళ్లీ నగ్మా పేరు తెర పైకి వచ్చింది. మాజీ మహారాష్ట్ర ముఖ్యమంత్రి విలాస్ రావు దేశ్ ముఖ్ మరణం తరువాత ఖాళీ అయిన రాజ్యసభ సీటుకు జనవరి 12 ఎన్నికలు జరగనున్నాయి. ఈ నేపథ్యంలో ఈమెను రాజ్యసభకు కాంగ్రెస్ తరుపున పంపేందుకు కొందరు మహారాష్ట్ర నాయకులు పావులు కదువుతున్నట్లు సమాచారం. ఇంత వరకు బాగానే ఉన్నా.... ఈమె కోసం పలువురు పోటీ పడటంతో కాంగ్రెస్ లో విభేదాలకు తెరలేచే ప్రమాదం ఉందని అంటున్నారు. విలాసరావ్‌ స్థానాన్ని భర్తీ చేసేందుకు ముఖ్యమంత్రి పృథ్వీరాజ్‌ చవాన్‌ సన్నిహితుడైన కాంగ్రెస్‌ నేత రోహిదాస్‌ పాటిల్‌ పేరును తెరపైకి తెచ్చారు.

ఈ నేపథ్యంలో అకస్మాత్తుగా నగ్మా పేరును సిఫార్సు చేయడంతో కాంగ్రెస్‌ సమీకరణాల్లో మార్పులు చోటుచేసుకోనున్నాయి. ఇప్పటికే ఈ పదవి కోసం ఆ రాష్ట్రం నుంచి రోహిదాస్‌ పాటిల్‌తో పాటు విదర్భలోని కాంగ్రెస్‌ నేత నరేశ్‌ పుగాలియా, మాజీ మంత్రి అనీస్‌ అహ్మద్‌లు ప్రయత్నిస్తున్నారు. కానీ కొందరు కాంగ్రెస్ నాయకులు మాత్రం నగ్మా అభ్యర్థిత్వం కోసం ఢిల్లీ స్థాయిలో కొందరు నేతలు అధిష్టానానికి సిఫార్సు చేస్తున్నారు. మహారాష్ట్ర కాంగ్రెస్‌ పార్టీ వ్యవహారాల ఇంఛార్జి మోహన్‌ ప్రకాశ్‌ కూడా నగ్మా అభ్యర్థిత్వాన్ని సమర్థిస్తున్నట్లు సమాచారం. నగ్మాది గుజరాత్‌ కాబట్టి కాంగ్రెస్‌ పార్టీ అధ్యక్షురాలు సోనియా గాంధీ రాజకీయ సలహాదారు అహ్మద్‌ పటేల్‌ మద్దతు లభించే అవకాశాలున్నాయి. నగ్మాకు అభ్యర్థిత్వం కట్టబెడితే గుజరాత్‌, మహారాష్ట్రలోని ముస్లిం సమాజంలోని మహిళకు కాంగ్రెస్‌ ప్రాధాన్యమిచ్చినట్లు సందేశం ప్రజల్లోకి వెళ్తుందని, తమిళనాడు, కేరళ, ఆంధ్రప్రదేశ్‌ రాష్ట్రాల్లో నగ్మా చరిష్మా ఉన్నందున దక్షిణాది ఓటర్ల మద్దతు ఉండొచ్చని అధిష్ఠానం దృష్టికి కొందరు తీసుకెళ్లినట్లు తెలుస్తుంది. ఇక మొత్తానికి నగ్మా కోసం కాంగ్రెస్ నాయకులు కుమ్ములాటలు చేసుకుంటున్నారని, ఆమె అంటే ఆ నాయకులకు ఎంత ఇదో అని అక్కడి వారు అనుకుంటున్నారు.