Posted: 11/08/2012 03:43 PM IST

టెస్టు క్రికెట్లో నెంబర్ స్థానాన్ని మళ్లీ సాధించేందుకు దృష్టిసారిస్తున్నామని టీమిండియా కెప్టెన్ ధోనీ అన్నాడు. గతేడాది ఇంగ్లండ్ పర్యటనలో వైట్‌వాష్ పరాజయం అనంతరం ధోనీసేన నెంబర్‌వన్ ర్యాంక్‌ను కోల్పోయిన సంగతి తెలిసిందే. 'అగ్రస్థానం సాధించాలన్న ఆలోచన ఎప్పట్నుంచో ఉంది. ఏ ఫార్మాట్లో ఆడినా నెంబర్‌వన్‌గా ఉండాలనే కోరుకుంటాం. ఇదో నిరంతరమైన ప్రక్రియ' అని మహీ చెప్పాడు. ఓ ప్రమోషన్ కార్యక్రమంలో పాల్గొనేందుకు వచ్చిన ధోనీ మాట్లాడుతూ.. త్వరలో ఆరంభమయ్యే భారత్, ఇంగ్లండ్ సిరీస్ ఆసక్తికరంగా ఉంటుందని అన్నాడు. ఇంగ్లండ్ లోపేతమైన జట్టని వ్యాఖ్యానించాడు. అయితే, తమ బలాలు, బలహీనతలపై దృష్టిసారించడం ముఖ్యమని, నిర్ణీత సమయంలో ఆటతీరు మెరుగుపరుచుకోవాల్సిన అవసరముందని ధోనీ అన్నాడు. సిరీస్‌కు ముందు ముంబయిలో నిర్వహించే శిబిరం తమకు ఉపయోగపడుతుందని చెప్పాడు. తన జీవితంలో క్రికెట్‌ను కెరీర్‌గా ఎంచుకుంటానని ఎప్పుడూ అనుకోలేదని చెప్పాడు. 'ఓ చిన్న పట్టణం నుంచి వచ్చా. క్రికెటే నా వృత్తి అవుతుందని ఎప్పుడూ భావించలేదు. భారత సైన్యంలో చేరాలని కోరుకున్నా. చిన్నతనంలో నా ఆశయం కూడా ఇదే. అయితే, క్రికెటర్‌గా ఎదిగా. ప్రతిదీ అనుకోకుండా జరిగింది. ఫస్ట్‌క్లాస్, దులీప్ ట్రోఫీ, ఇతర టోర్నీల్లో రాణించడంతో టీమిండియాకు ఆడే అవకాశం వచ్చింది' అని ధోనీ వివరించాడు.