బంజారాహిల్స్ పోలిస్ స్టేషన్లో దాసరి అరుణ్ కుమార్.. పలు వాహనాల ధ్వంసం!

Posted: 01/20/2022 01:18 PM IST

Tollywood actor dasari arun kumar held for negligent driving

ప్రముఖ సినీ దర్శక, నిర్మాత దివంగత దాసరి నారాయణరావు తనయుడు దాసరి అరుణ్ కుమార్ ను బంజారాహిల్స్ పోలీసులు అదుపులోకి తీసుకున్నారు. నిర్లక్ష్యంగా తన కారును నడుపుతూ.. రోడ్డుపై పార్క్ చేసివున్న ద్విచక్రవాహనాలను ఢీకొన్న ఘటనలో పోలీసులు ఆయనపై పలు సెక్షన్ల కింద కేసు నమోదు చేశారు. వాహనాలను ఢీకొట్టిన తరువాత ఆయన తన కారును ఆపకుండా వెళ్లిపోవడంతో పెట్రోలింగ్ లో ఉన్న పోలీసులు ఆయన కారును చేధించి అదుపులోకి తీసుకుని స్టేషన్ కు తరలించారు. అయితే కారు నుంచి దిగిన ఆయన మద్యం మత్తులో వీరంగం సృష్టించారని పోలీసులు తెలిపారు.

పోలీసులు కథనం ప్రకారం బుధవారం రాత్రి 10.30 గంటల ప్రాంతంలో హైదరాబాదులోని బంజారాహిల్స్ రోడ్ నెంబర్ 12లోని సయ్యద్ నగర్ కు దాసరి అరుణ్ కుమార్ తన కారులో వెళ్లారు. ఆ సమయంలో మద్యం మత్తులో ఉన్న ఆయన రోడ్డు పక్కన పార్క్ చేసివున్న ద్విచక్ర వాహనాలను ఢీకొట్టారు. ఈ ఘటనలో పలు వాహనాలు ధ్వంసమైనట్టు తెలుస్తోంది. దీంతో వాహనదారులు అరుస్తున్నా పట్టించుకోని అరుణ్ కుమార్ తన కారును ఏ మాత్రం అపకుండా ముందుకు వెళ్లారు. దీంతో పెట్రోలింగ్ లో వున్న పోలీసులు వెంటనే రంగంలోకి దిగి కారును చేధించారు. కారును నడుపుతున్న దాసరి అరుణ్ కుమార్ ను అదుపులోకి తీసుకున్నారు.

ఈ ఘటనలో పూర్తిగా ధ్వంసమైన ద్విచక్ర వాహనం యజమాని సయ్యద్ అఫ్జల్.. సహా పలువురు వాహనదారులు దాసరి అరుణ్ పై బంజారాహిల్స్ పోలీస్ స్టేషన్ లో ఫిర్యాదు చేశారు. దీంతో నిర్లక్ష్యంగా వాహనాన్ని నడపించిన దాసరి అరుణ్ కుమార్ పై పోలీసులు కేసు నమోదు చేశారు. సెక్షన్ 279, 336, మోటారు వాహనాల చట్టంతో పాటు డ్రంకెన్ డ్రైవ్ కింద కేసు బుక్ చేశారు. ఈ కేసు నేపథ్యంలో ఆయన ఇవాళ బంజారాహిల్స్ పోలీసుల ముందు హాజరయ్యారు. ఆయనను పోలీసులు న్యాయస్థానంలో ప్రవేశపెట్టనున్నారు.