దేశవ్యాప్తంగా కరోనా సామాజిక వ్యాప్తి..? పెరుగుతున్న కేసులు..

Posted: 01/03/2022 12:04 PM IST

Omicron scare maharashtra delhi and kolkata have reported a sharp increase covid cases

దేశంలో నూతన సంవత్సరం వేడుకల వేళ.. ఒమిక్రాన్ వేరియంట్ కరోనా మహమ్మారి మూడవదశ ముపుతో విరుచుకుపడుతోంది. ఇది సంక్రాంతి నుంచి మరింత వేగం పుంజుకుని ఫిబ్రవరి 3 నాటికి తీవ్రస్థాయికి చేరుతుందని కూడా ఐఐటీ కాన్పూర్ అంచనా వేసింది. వారి అంచనాలకు అనుగూణంగానే వారం రోజుల వ్యవధిలో కరోనా కేసులు ఐదు రెట్లు పెరగడం అందోళన కలిగిస్తోంది. గత సోమవారం 6358 కరోనా కేసులు రాగా, ఈ సోమవారం ఆ సంఖ్య ఏకంగా 33 వేలకు చేరింది. ఒమిక్రాన్ వేరియంట్ శరవేగంగా వ్యాప్తి చెందుతుందని చెప్పడానికి ఇదే ఈ భారీ సంఖ్యలో పెరుగుతున్న కేసులే నిదర్శనం.

ఒమిక్రాన్ వేరియంట్ డెల్టాతో పోల్చితే దాదాపు 30 రెట్లు వేగంగా వ్యాప్తి చెందుతుందని కూడా వైద్యనిపుణులు చెబుతున్నారు. ఇప్పటివరకు విదేశాలకు వెళ్లి వచ్చిన వ్యక్తులకు మాత్రమే సోకిన ఈ కొత్త మహమ్మారి తాజాగా ఎలాంటి వీదేశీయానం లేనివారికి కూడా సోకింది. నిపుణలు చెప్పినట్లు ఒమిక్రాన్ సామాజిక వ్యాప్తి ప్రస్తుతం దేశవ్యాప్తంగా కొనసాగుతోంది. దీంతో పలు రాష్ట్రాలు కోవిడ్ అంక్షల వైపు మొగ్గు చూపుతున్నాయి. దేశంలో ఒమిక్రాన్ వేరియంట్ కేసులు గణనీయంగా పెరిగాయి. దేశవ్యాప్తంగా ఈ కేసుల సంఖ్య ఏకంగా 1700లకు చేరింది. గడిచిన 24 గంటల వ్యవధిలో ఏకంగా 175 ఒమిక్రాన్ కేసులు నమోదయ్యాయి.

దేశంలో ఒమిక్రాన్ కొత్త కేసులు వేగంగా పెరుగుతున్నాయి. అత్యధికంగా మహారాష్ట్ర, ఢిల్లీ లలోనే ఈ కేసులు నమోదవుతున్నాయి. ఒమిక్రాన్ నేపథ్యంలో ఢిల్లీలో లెవల్ 2 దశ ఆంక్షలు అమలు చేస్తూ.. ఒమిక్రాన్ కట్టడికి చర్యలు చేపట్టారు. అయినా కేసులు మాత్రం పెరుగుతూనే వున్నాయి. ఇటు మ‌హారాష్ట్ర‌ను ఒమిక్రాన్ వేరియంట్ అత‌లాకుత‌లం చేస్తున్న‌ది. నిన్న‌టి వ‌ర‌కు ఒక్క మ‌హారాష్ట్ర‌లోనే 510 ఒమిక్రాన్ పాజిటివ్ కేసులు న‌మోదు అయ్యాయి. ఢిల్లీలో 361 పాజటివ్‌ కేసులతో రెండో స్థానంలో ఉంది. కేరళలో 156, గుజరాత్‌లో 136, తమిళనాడులో 121, రాజస్తాన్లో 120, తెలంగాణలో 67, కర్నాటకలో 64, హర్యానా 63, ఒడిశా 37, పశ్చిమ బెంగాల్ లో 20, ఆంధ్రప్రదేశ్ లో 17 కేసులు నమోదు కాగా.. మరో 11 రాష్ట్రాల్లో సింగిల్ డిజిట్ లో ఒమిక్రాన్ కేసులు నమోదయ్యాయి.