బషీర్ బాగ్ బహుళ అంతస్థు భవనంలో అగ్నిప్రమాదం

Posted: 01/23/2019 05:42 PM IST

హైదరాబాద్ బషీర్ బాగ్ లో భారీ అగ్ని ప్రమాదం సంభవించింది. ఇవాళ ఉదయం లాల్ బహదూర్ స్టేడియం సమీపంలో ఉన్న ఖాన్ లతీఫ్ ఖాన్ భవనంలోని ఐదో అంతస్తులో మంటలు చెలరేగాయి. ఈ భవనంలో అధికంగా ఐటీ, సాప్ట్ వేర్ పరిశ్రమలే వున్నాయి. పోగవాసన విపరీతంగా రావడంతో ప్రమాదాన్ని గమనించి అక్కడ పనిచేస్తున్న ఉద్యోగులు భయంతో బయటకు పరుగులు తీశారు. పలువురు ఉద్యోగులు తమ మోబైల్ ఫోన్లతో పోలీసులకు సమాచారం అందించారు.

ఖాన్ లతీఫ్ ఖాన్ భవనంలోని ఐదో అంతస్తులో ఉన్న ఉద్యోగులతో పాటు.. మిగతా అంతస్థులలో వున్న వారు కూడా అప్రమత్తమై సురక్షితంగా బయటకు వచ్చేయగా.. వెంటనే అగ్నిమాపక సిబ్బందికి సమాచారం ఇవ్వడంతో రంగంలోకి దిగారు. ఫైర్ సిబ్బంది నలుగు అగ్నిమాపక యంత్రాలతో మంటల్ని ఆర్పుతున్నారు. అయితే మంటలు అదుపులోకి రాకపోవడంతో ఘటనాస్థలానికి పది అగ్నిమాపక యంత్రాలు వెళ్లి మంటలార్పే ప్రయత్నం చేస్తున్నారు.

బిల్డింగ్‌లోని ట్యాక్స్ కన్సల్టెంట్‌ ఆఫీసులో జరిగిన షార్ట్‌ సర్క్యూట్‌తోనే ప్రమాదం సంభవించిందని అనుమానిస్తున్నారు. ప్రమాదం వల్ల భారీగా ఆస్తి నష్టం జరిగిందని అంచనా వేస్తున్నారు. ఈ భవనంలో పలు కీలక కార్యాలయాలు ఉన్నాయి. రెండో అంతస్తులో రెండు తెలుగు రాష్ట్రాల ఐడియా ప్రధాన కార్యాలయాలు ఉన్నాయి. చాలా మంది నివాసం కూడా ఉంటున్నారు. మంటల్ని గమనించి అప్రమత్తం కావడంతో పెద్ద ప్రమాదమే తప్పింది. లేకపోతే ప్రాణనష్టం జరిగేదని ప్రత్యక్ష సాక్షులు చెబుతున్నారు.