ఆ ఆటలు అడితే ఇక కటకటాలే.. ప్రభుత్వం ఉక్కుపాదం

Posted: 05/21/2017 09:36 AM IST

తెలంగాణ రాష్ట్రం అవిర్భావంతోనే అధికారంలోకి వచ్చిన టీఆర్ఎస్ ప్రభుత్వం.. జూదశిఖామణులపై కోరడా ఝళిపించింది. అయినా పేకాట పాపారావులు, ఆన్ లైన్ వేదికగా తమ జూదకళలను ప్రదర్శిస్తూ.. ధర్మారాజు తరహాలో ఇల్లు గుల్ల చేస్తున్నారు. ఈ విషయం కూడా ప్రభుత్వం దృష్టికి తాజాగా రావడంతో., ఇక అంతర్జాల వేదికపై సాగుతున్న జూదానికి చెక్ పెట్టేందుకు తెలంగాణ ప్రభుత్వం సిద్ధమైంది. మురిపించి, మెరిపించి నట్టేట ముంచే ఈ ఆన్‌లైన్ జూదానికి చెక్ చెప్పాలని నిర్ణయించింది. చట్టాలను సవరించి ఇకపై ఇంట్లో అడినా.. మొబైల్ ఫోన్ లో అడినా వారిపై కేసులు నమోదు చేసిన కటకటాల వెనక్కి పంపుతామని హెచ్చరికలు జారీ చేసింది.

అందులో భాగంగా తెలంగాణ గేమింగ్ చట్టం-1974కు సవరణలు చేసేందుకు సిద్ధమైంది. ఇందులో ‘సైబర్ స్పేస్’ అనే పదాన్ని జోడించడం ద్వారా ఆన్‌లైన్‌లో జోరుగా సాగుతున్న గుర్రపు పందేలు, పేకాట, క్రికెట్ బెట్టింగ్ వంటివాటిపై ఉక్కుపాదం మోపేందుకు రెడీ అవుతోంది. ఇందులో భాగంగా కంప్యూటర్‌, సెల్‌ఫోన్‌లలో ఈ ఆటలు ఆడేవారిపై  కేసులు నమోదు చేసి అరెస్ట్ చేస్తారు. ఇంట్లో రహస్యంగా ఆడుతున్నామని అనుకోవడానికి వీల్లేదు. ఎందుకంటే గేమింగ్ సైట్లలో తరచూ లాగిన్ అయ్యే వారిపై పోలీసులు నిఘా పెడతారు.

సర్వీస్ ప్రొవైడర్ల సహకారంతో వివరాలు సేకరించి క్రిమినల్, నాన్-బెయిలబుల్ సెక్షన్ల కింద కేసులు పెడతారు. గేమింగ్ నిర్వాహకులపైనా చర్యలు తీసుకుంటారు. దాడుల్లో పట్టుబడే నగదు, ఆభరణాలు, ఇతర వస్తువులను స్వాధీనం చేసుకుంటారు. నిందితులను అరెస్ట్ చేయడమే కాకుండా ఆట కోసం ఉపయోగించిన బ్యాంకు ఖాతాను స్తంభింపజేస్తారు. ఈ నేరం చేస్తూ తొలిసారి పట్టుబడితే ఏడాది జైలు, రూ.5 వేల జరిమానా, రెండోసారి పట్టుబడితే అందుకు రెట్టింపు శిక్ష, జరిమానా విధిస్తారు. చట్టం సవరణకు న్యాయపరమైన ప్రక్రియ ఇప్పటికే పూర్తి అవడంతో త్వరలోనే ప్రభుత్వం ఆర్డినెన్స్ జారీ చేయనుంది.