స్మృతి ఇరానీ రహస్య కెమెరా కేసులో నలుగురి అరెస్టు,

Posted: 04/04/2015 01:36 PM IST

గోవాలోని కాండోలిమ్ ప్రాంతంలో గల ప్రముఖ వస్త్ర దుకాణం ఫ్యాబ్ ఇండియా గుట్టును కేంద్ర మానవవనరుల శాఖ మంత్రి స్మృతి ఇరానీ రట్టుచేసిన కేసులో.. పోలీసులు నలుగురు ఉద్యోగస్థులను అరెస్టు చేశారు. ఈ కేసులో మరికోందరు సీనియర్ ఎగ్జిక్యూటివ్ అధికారులను కూడా పోలీసులు ఇవాళ విచారించనున్నట్లు సమాచారం.. దేశవ్యాప్తంగా శాఖోపశాఖలున్న ఫ్యాబ్ ఇండియా వస్త్ర నిలయంలోకి వెళ్లిన మంత్రి స్మృతి ఇరానీ.. తనకు నచ్చిన వస్త్రాలను తీసుకుని డ్రెస్ చేయింగ్ రూంలోకి వెళ్లి మార్చుకునే ముందు పరిశీలించగా, అమెకు రహస్య కెమెరాలు కంటపడ్డాయి. దీంతో పోలీసులకు సమాచారం ఇవ్వడంతో వారు కేసు నమోదు చేసిన విషయం తెలిసింది.

మరోవైపు దేశవ్యాప్తంగా శాఖలు వున్న ఫ్యాబ్ ఇండియా ఎండీకి కూడా సమన్లు జారీ  చేయనున్నారని సమాచారం. సాక్షాత్తు కేంద్ర మంత్రికే  ఇలాంటి అవాంఛనీయ సంఘటన ఎదురుకావడం దేశవ్యాప్తంగా పెద్ద చర్చకు దారితీసింది. దీంతో గోవా ప్రభుత్వం ఈ కేసును  ప్రతిష్టాత్మకంగా తీసుకుంది. అంతేకాక దేశవ్యాప్తంగా అన్ని శాఖలలోనూ తనిఖీలను నిర్వహించాలని పోలీస్ శాఖ భావిస్తోంది.

జి.మనోహర్