Posted: 02/26/2013 03:49 PM IST

మలిసంధ్య వేళ...అప్పుడప్పుడే చీకట్లు పరుచుకుంటున్నాయి. నగరంలోని ప్రధాన వ్యాపార కేంద్రం దిల్‌సుఖ్‌నగర్‌లో జనం రద్దీ ఎక్కువగా ఉంది. శిక్షణా కేంద్రాల నుంచి విద్యార్థులు ఇంటికి బయలుదేరారు. కార్యాలయాలు వదిలిన ఉద్యోగులు తమకు కావలసినవస్తువులు కొనుక్కొని ఇంటిదారి పట్టారు. ఇంకొందరు సరుకులు కొనుగోలు చేస్తున్నారు. కొందరు హోటళ్లలో, టిఫిన్ సెంటర్లలో అల్పాహారం తీసుకుంటున్నారు. దుకాణాలు,రహదారులు కిక్కిరిసి ఉన్నాయి. సరిగ్గా ఆ సమయంలోనే ముష్కరులు నిముషాల వ్యవధిలో రెండు బాంబులను పేల్చారు. భారీ విస్ఫోటనం, కళ్లు చెదిరే మంటలు, ఎగిరిపడిన మనుషులు, వాహనాలు. అప్పటివరకు సందడిగా ఉన్న ఆ ప్రాంతంలో రెప్పపాటులోనే జన జీవనం కకావికలమైంది. పలు ప్రాణాలు గాలిలో కలిసిపోయాయి. పదుల సం ఖ్య లో క్షతగాత్రులయ్యారు.

కాళ్లు తెగిపోయి కొందరు, చేతులు కోల్పోయి ఇంకొందరు, శరీర భాగాలు ఛిద్రమై కొందరు. క్షణాలలోనే ప రిస్థితి హృదయవిదారకంగా మారింది. అధికంగా రద్దీ ఉన్న ప్రాంతాలను అప్పటికప్పుడు ఎంచుకుని బాంబు పేలుళ్లకు పాల్పడినట్లు అనుమా నాలు వ్యక్తం అవుతున్నాయి. కమిషనర్ అనురాగశర్మ సాయిబాబా దేవాలయాన్ని సందర్శించి వెళ్లిన కొద్ది నిమిషాలలోనే ఈ సంఘటన చోటు చేసుకుంది. ఆనాటి సంఘటన నుంచి స్థానికులు ఇంకా తేరుకోలేదు. దిల్‌సుఖ్‌నగర్ ప్రాంతం అర్ధరాత్రి వరకు నిత్యం రద్దీగా ఉంటుంది. ఇక్కడ పలు జిల్లాలకు చెందినవారు నివసిస్తారు. దూరప్రాంతాలకు వెళ్లేవారు ఇక్కడి బ స్టాండ్ నుంచి రాకపోకలు సాగిస్తారు. సాయంత్రం పలువురు చౌరస్తాకు చేరుకుని మిత్రులను కలసి పిచ్చా పాటిగా మాట్లాడుకుంటారు. కొందరు టీ తాగడానికి వస్తారు. కోచింగ్ సెంటర్లు ఉన్నందున విద్యార్థులు ఎక్కువగా కనిపిస్తారు. భారీ వస్త్రాల దుకాణాలున్నాయి. చిరువ్యాపారులు పుట్‌పాత్‌లపై దుకాణాలు నడుపుతుంటారు. అందుకే బాంబు పేలుళ్లలో ప్రాణనష్టం ఎక్కువగా జరిగింది. క్షతగాత్రుల సంఖ్య కూడా పెరిగింది. ఏం జరిగిందోనని తెలుసుకోవడానికి కొన్ని క్షణాలు పట్టింది. కొందరు క్షణాలలోనే తేరుకుని 108కు ఫోన్ చేశారు. క్షతగాత్రులను ఆస్పత్రులకు తరలించారు.