Posted: 02/26/2013 04:28 PM IST

దిల్‌సుఖ్‌నగర్‌లో జన జీవనం క్రమంగా సాధారణ స్థితికి చేరుకుంటోంది. గురువారం నాటి బాంబు పేలుళ్లతో మూతపడిన దుకాణాలు సోమవారం నుంచి తెరుచుకుంటున్నాయి. ద్వంసమైన వస్తువులను తొలగించి, చెల్లాచెదురుగా పడిపోయిన వస్తువులను దుకాణాల యజమానులు సరిచేసుకుంటున్నారు. ప్రధాని పర్యటన ఉన్నందున దుకాణాలను తెరవద్దని పోలీసు లు చెప్పడంతో నాలుగు రోజులపాటు మూసేశామని వారు తెలిపారు.  కొన్ని వ్యాపారాలు శనివారమే ప్రారంభమైనా, బాంబు లు పేలిన స్థలాలకు ఆనుకుని ఉన్న దుకాణాలు మాత్రం సోమ వారం తెరుచుకున్నాయి. పుట్‌పాత్ వ్యాపారాలకు పోలీసులు అనుమతినివ్వకపోవడంతో రోజువారీ ఉపాధి పొందే చిరువ్యాపారుల పరిస్థితి దయనీయంగా మారింది. స్థానికులను ఇంకా భయం వెంటాడుతూనే ఉంది. దిగ్భ్రాంతి నుంచి వారు పూర్తిగా తేరుకోలేకపోతున్నారు. రాజీవ్‌చౌక్ నుంచి పీఅండ్‌టీ కాలనీ వైపు వాహనాల రాకపోకలు యథావిధిగా కొనసాగుతున్నాయి. బస్సులు నడవడంతో 107 బస్టాప్ వద్ద ప్రయాణికుల సందడి కనిపించింది.

దిల్‌సుఖ్‌నగర్ చౌరస్త్తాలో ఉన్న టీ, సోడా, మిర్చీ, టిఫిన్ సెంటర్లు వెలవెలపోతున్నాయి. కొనుగోలుదారులు వ్యాపార సముదాయాలకు రావడానికి జంకుతున్నారు. ముఖ్యుల సందర్శనలు ఉండడంతో ఆదివారం వరకు భారీగా కనిపించిన పోలీసుల సంఖ్య సోమవారం తగ్గిపోయింది. నగరం నుంచే కాకుండ సుదూర ప్రాంతాలకు చెందినవారు పేలుళ్ల స్థలాలను పెద్ద సంఖ్యలో సందర్శిస్తున్నారు. దుర్ఘటనలో మృతి చెందిన వారి ఆత్మశాంతి కోసం పలు పార్టీలకు చెందిన నాయకులు, స్వచ్ఛంద సంస్థలు, విద్యార్థి సంస్థలు, మహిళాసంఘాల నేతలు నివాళులు అర్పిస్తున్నారు. మృతుల ఆత్మకు శాంతి చేకూరాలని, ఉగ్రవాదం నశించాలని ఫ్లెక్సీలు కటౌట్‌లు ఏర్పాటు చేశారు.