పాక్ ను కుమ్మేయండి...

Posted: 02/13/2015 06:05 PM IST

ఫిబ్రవరి 14వ తేదీ నుంచి ప్రారంభం కానున్న వరల్డ్ కప్ సమరంలో ఇండియా జట్టు తొలుత పాకిస్తాన్ తో తలపడుతున్న విషయం తెలిసిందే! ఈనెల 15వ తేదీ జరగనున్న ఈ మ్యాచ్ లో ఏ జట్టు గెలుస్తుందోనన్న ఉత్కంఠ ఆ రెండుదేశాలతోపాటు ప్రపంచవ్యాప్తంగా క్రికెట్ అభిమానుల్లో నెలకొంది. తమదేశమే గెలుస్తుందని పాక్ ప్రముఖులు చెప్పుకుంటుండగా.. అసలు ప్రపంచ క్రికెట్ చరిత్రలోనే పాక్ చేతిలో ఓడని భారత్ ఈసారి కూడా ఖచ్చితంగా గెలుస్తుందని దేశ అభిమాలతోపాటు ఇతర ప్రముఖులు నమ్మకాన్ని వ్యక్తం చేస్తున్నారు.

ఇక ఇండియా మాజీ క్రికెటర్లైతే ప్రస్తుతమున్న ఆటగాళ్లను ఉత్సాహపరిచేందుకు తమదైన శైలిలో వారిపై ప్రశంసలు కురిపిస్తున్నారు. ఇప్పుడున్న ఆటగాళ్లందరూ ఖచ్చితంగా విజయం సాధిస్తారనే నమ్మకాన్ని వ్యక్తం చేస్తూ.. పాక్ ను ఓడించాలంటూ వారిని సూచిస్తున్నారు. ఇందులో భాగంగానే మాజీ క్రికెటర్ మొహీందర్ అమర్ నాథ్ కూడా ఇండియా ఆటగాళ్లకు కొన్ని సూచనలు జారీ చేశాడు. మొదటి మ్యాచ్ లో పాకిస్తాన్ ను కుమ్మేయండంటూ ఆయన తాజాగా వ్యాఖ్యానాలు చేశారు. ఇండియా ఖచ్చితంగా గెలుస్తున్న నమ్మకం ఆయన వ్యక్తపరిచాడు.

* పాకిస్థాన్ కు భారత్ మీద వన్డేల్లో మంచి రికార్డు వుందన్న విషయాన్ని గుర్తు చేసిన ఆయన.. ప్రపంచకప్ పోటీల్లో మాత్రం ఇంతవరకూ పాక్ తో పోటీల్లో ఇండియాకు ఓటమే లేదని స్పష్టం చేశారు.
* రెండు జట్లలో మంచి క్రీడాకారులు వున్నారని, అయితే పాకిస్తాన్ మీద ఇండియా గెలువడం అంటూ జరిగితే అది కేవలం బ్యాటింగ్ వల్లే తప్ప బౌలింగ్ వల్ల కాదంటూ ఆయన వివరించాడు.
* ప్రస్తుత జట్టులో సచిన్, రాహుల్ ద్రవిడ్, వీరేంద్ర సెహ్వాగ్, వీవీఎస్ లక్ష్మణ్, యువరాజ్ సింగ్ లాంటి ఆటగాళ్లతో సరిపోయేవాళ్లు ఎవరూ లేరని ఆయన వ్యాఖ్యానించారు.
* వరల్డ్ కప్ క్రికెట్ పోటీల చరిత్రలో సచిన్ లేకుండా పాకిస్తాన్ జట్టుతో ఇండియా తలబడటం ఇదే మొదటిసారని అన్నాడు.
* తొలి మ్యాచ్ లో ఆటగాళ్లు తమ సత్తా మేరకు రాణించాలని ఆయన ఆకాంక్షించాడు. పాకిస్తాన్ ను కుమ్మేయాలంటూ అన్నారు.