అంకిత, రోహన్ జోడీలకు పతకాలు ఖాయం..

Posted: 08/22/2018 06:06 PM IST

ఇండోనేషియా వేదికగా జరుగుతోన్న 18వ ఆసియా క్రీడల్లో టెన్నిస్ విభాగంలో భారత్‌ పతకం ఖాయం చేసుకుంది. మహిళల సింగిల్స్ లో భారత క్రీడాకారిణి అంకిత రైనా సెమీస్‌ చేరింది. దీంతో ఆమెకు పతకం ఖరారైంది. పోటీల్లో భాగంగా ఇవాళ అంకిత క్వార్టర్‌ ఫైనల్ లో హాంకాంగ్‌ క్రీడాకారిణి వాంగ్‌ చాంగ్ తో తలపడి విజయాన్ని అందుకుని సెమీస్ కు దూసుకెళ్లి పతకాన్ని ఖాయం చేసుకుంది.

హాంకాంగ్ క్రీడాకారిణి వాంగ్ చాంగ్ తో జరిగిన మ్యాచ్ లోని తొలిసెట్ లో ఒకానొక దశలో 1-4తో బాగా వెనకబడిపోయింది అంకిత. ఆటలో అన్ని సాధ్యమే అనుకుని వెనుకబడినా ముందుకురావచ్చునన్ని పట్టుదల, అంకుఠిత దీక్షా, ఏకాగ్రతలతో ఒత్తిడిని అధిగమించింది. మ్యాచ్‌పై ఏమాత్రం పట్టు విడవకుండా వీరోచితంగా పోరాడింది. దీంతో 4-4తో తొలి సెట్‌ను సమం చేసింది. ఆ తర్వాత ప్రత్యర్థికి కోలుకునే అవకాశం ఇవ్వకుండా 6-4తో మొదటి సెట్‌ను సొంతం చేసుకుంది.

రెండో సెట్ లోనూ అంకిత మరింత జోరు పెంచింది. ఏకంగా రెండో సెట్ ను 27 నిమిషాల్లోనే ముగించేసింది. తన ప్రత్యర్థి వాంగ్ చాంగ్ ను 6-1తో మట్టికరిపించి సెమీఫైనల్ కు బర్త్ ను కన్ఫామ్ చేసుకుని పతకాన్ని రిజర్వు చేసుకుంది. దీంతో ఆసియా క్రీడల్లో అంకితకు పతకం ఖాయమైంది. 25 ఏళ్ల అంకిత రైనా గుజరాత్‌ వాసి. మరోపక్క పురుషుల డబుల్స్ లో రోహన్ బొప్పన్నా, దివిజ్ శరణ్ ల జోడీ కూడా సెమీస్ కు చేరి పతకాన్ని రిజర్వు చేసుకుంది. చైనీస్ తైపీ హైక్ చెంగ్ పింగ్ లయద యాంగ్ సాంగ్ హ్వా జోడీలను 6-3, 4-6, 3-6లతో ఓడించి సెమీస్ చేరింది. దీంతో భారత్ కు ఆసియా క్రీడల్లో టెన్నిస్ విభాగంలో మరో రెండు పతకాలు ఖాయంగా రానున్నాయి.