టీమిండియాపై గెలుపుకు స్పిన్నర్లదే కీలక పాత్ర

Posted: 01/10/2020 10:19 PM IST

Australian pacer cummins expects spinners to play big role in india

టీమిండియాతో వన్డే సిరీసులో తమ జట్టు స్పిన్నర్లు అత్యంత కీలకం అవుతారని ఆసీస్‌ పేసుగుర్రం కమిన్స్‌ అన్నాడు. పరిమిత ఓవర్ల క్రికెట్లో దుమ్ముతో కూడిన గాలులు ఎదురవ్వక పోవచ్చని అంచనా వేశాడు. ఈ నెల 14న ముంబయిలో భారత్‌, ఆస్ట్రేలియా తొలి వన్డేలో తలపడతాయి. 17న రాజ్‌కోట్‌, 19న బెంగళూరులో మిగతా మ్యాచులు జరుగుతాయి.

‘చివరి సిరీస్‌లో మేం ఇద్దరు స్పిన్నర్లతో ఆడాం. టీమిండియా సైతం ఇద్దరిని ఆడించింది. అందుకే మ్యాచుల్లో వారెంతో కీలకం. మధ్య ఓవర్లలోనైతే మరీనూ’ అని కమిన్స్‌ అన్నాడు. ప్రస్తుతం ఆసీస్‌ జట్టులో ఆస్టన్‌ ఆగర్‌, ఆడమ్‌ జంపా రూపంలో ఇద్దరు స్పిన్నర్లు ఉన్నారు. మార్నస్‌ లబుషేన్‌ సైతం పార్ట్‌టైం స్పిన్నర్‌గా సాయపడతాడు. ఉపఖండం పిచ్‌ల గురించి అతడు మాట్లాడాడు.

ఆట సాగే కొద్దీ బంతి ఎక్కువ నునుపు అవుతుందని కమిన్స్‌ అభిప్రాయపడ్డాడు. అందుకే ఇతర దేశాలతో పోలిస్తే బౌలింగ్‌ చేయడం అత్యంత సులభమని పేర్కొన్నాడు. చిన్నవి, వేగవంతమైన మైదానాలు కాబట్టి కొన్ని సవాళ్లూ ఎదురవుతాయన్నాడు. ‘కొత్త బంతి ముందుభాగం ఎక్కడైనా ఒకేలా ఉంటుంది. ఆటసాగే కొద్దీ బంతి ఎక్కువ నునుపు అవుతుంది. అందుకే ఇతర దేశాలతో పోలిస్తే ఇక్కడ సులభంగా బౌలింగ్‌ చేయొచ్చు. ఆస్ట్రేలియాతో పోలిస్తే ఉపఖండం మైదానాలు చిన్నవి, వేగవంతమైనవి. కాబట్టి కొన్ని సవాళ్లు ఎదురవుతాయి. బంతితో ఎక్కువ వేగం, బౌన్స్‌ రాబట్టడం కాస్త కష్టం’ అని కమిన్స్‌ తెలిపాడు.