విరాట్.. చేయకూడని తప్పులు చేస్తున్నావ్..!

Posted: 10/18/2017 05:05 PM IST

Virat kohli disappoints fans on anil kumble s birthday

భారత క్రికెట్‌ జట్టు సారథి విరాట్‌ కోహ్లీపై క్రికెట్‌ అభిమానులు అసంతృప్తిగా ఉన్నారు. ఎందుకంటే.. జంబోకు పుట్టిన రోజు శుభాకాంక్షలు తెలపకపోవడమే. కోహ్లీతో మనస్పర్థల కారణంగానే కుంబ్లే ఈ ఏడాది జూన్‌లో ఛాంపియన్స్‌ ట్రోఫీ ముగిసిన అనంతరం కోచ్‌ పదవికి రాజీనామా చేసిన సంగతి తెలిసిందే. అయితే విరాట్ కోహ్లీ పై అభిమానులు మరీ ముఖ్యంగా నెట్ జనులు తీవ్రంగా ఫైర్ అవుతున్నారు. కోహ్లీ చేయకూడని తప్పులు చేస్తున్నావ్ అంటూ మందలించే విధంగా కామెంట్లు పోస్ట్ చేస్తున్నారు.

భారత మాజీ కోచ్‌ అనిల్‌ కుంబ్లే మంగళవారం 47వ పుట్టిన రోజు జరుపుకొన్న సంగతి తెలిసిందే. ఈ నేపథ్యంలో మాజీ, ప్రస్తుత క్రికెటర్లు సచిన్‌, సెహ్వాగ్‌, లక్ష్మణ్‌, పుజారా, రహానె, ఇషాంత్‌ శర్మతో పాటు ఎంతో మంది క్రికెటర్లు జంబోకు సోషల్‌మీడియా వేదికగా పుట్టిన రోజు శుభాకాంక్షలు తెలిపారు. ఒక్క విరాట్‌ కోహ్లీ తప్ప. దీంతో అభిమానులు ఆగ్రహానికి గురయ్యారు. ‘గత ఏడాది ఇదే రోజు విషెస్‌ చెప్పిన కోహ్లీకి ఈ ఏడాది ఏమైంది’ అంటూ పలువురు ప్రశ్నించారు.

‘కోహ్లీకి గాయకుడు అర్జిత్‌ సింగ్‌ను అభినందించేందుకు సమయం ఉంది కానీ జంబోకి బర్త్‌డే విషెస్‌ చెప్పేందుకు టైం లేదు’... ‘టీవీ షోలో పాల్గొనేందుకూ, ఫుట్‌బాల్‌ మ్యాచ్‌ ఆడేందుకూ వీలు కుదిరింది.. కుంబ్లేకు విషెస్‌ చెప్పడమే కుదరలేదు’... ‘అనిల్‌ భాయ్‌కి కోహ్లీ విషెస్‌చెప్పకపోవడం చాలా బాధ కలిగించింది’... ‘నువ్వెందుకు కుంబ్లేని విష్‌ చేయలేదు.. కోహ్లీ నీ అహాన్ని కాస్త పక్కన పెట్టు’... ‘జంబో బర్త్‌ డేకి అందరూ విష్‌ చేశారు.. ఒక్క కోహ్లీ తప్ప, కుంబ్లేను విష్‌ చేసేందుకు కోహ్లీకి అహం అడ్డొచ్చింది’... ఇలా అభిమానులు తమకు నచ్చిన రీతిలో కోహ్లీ తీరుపై స్పందించారు. లెజెండరీ స్పిన్నర్‌ కుంబ్లేపై తమకున్న అభిమానాన్ని వెల్లడించారు.