అరుదైన ఘనతను ఖాతాలో వేసుకున్న స్మిత్

Posted: 03/17/2017 09:04 PM IST

భారత్ తో జరుగుతున్న మూడో టెస్టులో ఆస్ట్రేలియా కెప్టెన్  స్టీవ్ స్మిత్  సరికొత్త ఘనతను సొంతం చేసుకున్నాడు. రాంచీ వేదికగా జేఎస్‌సీఏ స్టేడియంలో భార‌త్‌తో జరుగుతున్న టెస్టు మ్యాచ్‌లో స్టీవ్ స్మిత్ మ‌రో కొత్త మైలురాయిని అందుకున్నాడు. మ్యాక్స్ వెల్ మిన‌హా మిగ‌తా ఆట‌గాళ్లంతా విఫ‌ల‌మైనా.. స్టీవ్ స్మిత్ మాత్రం కెప్టెన్ ఇన్నింగ్స్ తో బాగా రాణించడంతో పాటు తమ జట్టుకు చెందిన ఇతర కెప్టెన్లను మించిపోయాడు. ఇవాళ జరిగిన రోజు ఆటలో ఆయ‌న 130 పరుగుల వ్యక్తిగత స్కోరును దాటడంతో ఆస్ట్రేలియా మాజీ కెప్టెన్ మైకేల్ క్లార్క్ పాత రికార్డును బ‌ద్దలుకొట్టాడు.

2012-13 సీజన్ లో భారత్ లో క్లార్క్‌ అత్యధిక వ్యక్తిగత పరుగులు సాధించిన విష‌యం తెలిసిందే. ఆ రికార్డునే స్మిత్ దాటేశాడు. అంతేకాదు, భారత్ లో ఒక సిరీస్ లో రెండు, అంతకంటే ఎక్కువ సెంచరీలు సాధించిన మూడో కెప్టెన్ గా కూడా ఘ‌న‌త సాధించాడు. పుణెలో జ‌రిగిన‌ తొలి టెస్టు రెండో ఇన్నింగ్స్ లో స్మిత్ సెంచ‌రీ చేశాడు. దీంతో గ‌తంలో ఈ ఘనతను సాధించిన క్లైవ్ లాయిండ్(1974-75), అలెస్టర్ కుక్(2012-13)ల స‌ర‌సన‌ నిలిచాడు.