అజింక్య రహానేపై ప్రశంసలు కురిపించిన శ్రీధర్

Posted: 09/04/2015 06:57 PM IST

భారత బ్యాట్స్ మెన్ అజింక్య రహానేపై టీమిండియా క్రికెట్ ఫీల్డింగ్ కోచ్ ఆర్ శ్రీధరన్ ప్రశంసలు కురిపించారు. ప్రస్తుత తరం క్రికెటర్లలో మెరుగైన ఫీల్డర్లలో రహానే ఒకరని ఆయన ధీమాగా చెప్పారు. ఆటగాళ్ల ఫీల్డింగ్ గురించి మీడియా ఆయనను ప్రశ్నించగా.. 'దేవుడైనా కూడా పొరపాటున క్యాచ్ వదిలేస్తాడేమో కానీ రహానే అలా కాదు' అంటూ జట్టు ఆటగాడిని ప్రశంసించాడు. ఫీల్డింగ్ అనేది ఆటగాళ్లకు ఉండాల్సిన ప్రాథమిక నైపుణ్యమని శ్రీధర్ పేర్కొన్నాడు. కొన్నిసార్లు తప్పులు జరుగుతాయని వెంటనే వాటి నుంచి పాఠం నేర్చుకోవాలని ఆటగాళ్లకు సూచించాడు.

లంకతో రెండో టెస్టులో కుమార సంగక్కర క్యాచ్ వదిలేసిన రహానే.. ఆరు ఓవర్ల తర్వాత అదే ఆటగాడు ఇచ్చిన క్యాచ్నే ఒంటి చేత్తో ఒడిసిపట్టడం చూస్తే అతని ఫీల్డింగ్ ప్రతిభ అర్థమవుతోందంటూ కితాబిచ్చాడు. టీమిండియా ఆటగాళ్ల ఫీల్డింగ్ మెరుగు చేయడంపై బీసీసీఐ దృష్టిపెట్టినట్లు కనిపిస్తోందని... ఏ జట్టుకైనా ఫీల్డింగ్ కీలక అంశమని అన్నాడు. శ్రీలంకతో జరిగిన టెస్ట్ సిరీస్లో భారత్ ఫీల్డింగ్ కొంత మెరుగైందని.. దీంతోనే లంక ఆటగాళ్లను టీమిండియా క్రికెటర్లు ఒత్తిడిలోకి నెట్టగలిగారని తాను నమ్ముతున్నట్లు చెప్పారు. శ్రీలంకతో సిరీస్ లో బాగా రాణించిన ఆటగాళ్లలో అమిత్ మిశ్రా ఒకడని శ్రీధర్ అభిప్రాయపడ్డాడు.

జి మనోహర్