బీసీసీఐ రేసులో శరద్ పవార్..?

Posted: 02/02/2015 05:50 PM IST

దేశ సర్వోన్నత న్యాయస్థానం సుప్రీంకోర్టు ఆదేశానుసారం త్వరలో రానున్న బీసీసీఐ అధ్యక్ష పదవికి జరిగే ఎన్నికలకు మాజీ బీసీసీఐ అధ్యక్షుడు, ప్రస్తుత ముంబై క్రికెట్ అసోసియేషన్ అధ్యక్షుడు శరద్ పవార్ సన్నద్ధమవుతున్నారు. శ్రీనివాసన్ ను బీసీసీఐ నుంచి తొలగించడం శుభపరిణామంగా అత్యున్నత న్యాయస్థానం తీర్పు వెలువరించిన తరుణంలో తన స్పందనను తెలిపిన పవార్.. మరోమారు బీసీసీఐ పగ్గాలను అందుకునేందుకు బరిలో నిలవనున్నారు. 2005 నుంచి 2008 వరకూ బీసీసీఐ అధ్యక్షునిగా పవార్ పనిచేశారు. శ్రీనివాస్ తోలగింపుతో అందివచ్చిన అవకాశాన్ని మళ్లి చేజిక్కించుకునేందుక తెర వెనుక తన ప్రయత్నాలను ముమ్మరం చేశారు.

మూడేళ్ల పాటు బీసీసీఐ అధ్యక్ష పదవిలో కొనసాగిన అనుభవాన్ని తనకు అనుకూలంగా మార్చుకునేందుకే యత్నాలు ఆరంభించారు. అయితే కోర్టు నిర్ణయంపై శ్రీనివాస్ స్పందించే తీరును పరిశీలించాకే తన నిర్ణయాన్ని పవార్ ప్రకటించే అవకాశం ఉంది. ఇందుకోసం ఫిబ్రవరి 14 వరకూ వేచి చూడాలని పవార్ యోచి చూస్తున్నారు. ఐపీఎల్ స్పాట్ ఫిక్సింగ్ కేసుకు సంబంధించి ఐసీసీ చైర్మన్ ఎన్. శ్రీనివాసన్ ఏదో ఒక పదవికి మాత్రమే పరిమితం కావాలని సుప్రీం కోర్టు కీలక వ్యాఖ్యలు చేయడంతో ఆయన ఏలాంటి నిర్ణయం తీసుకుంటారన్న అంశంపై స్పష్టత వచ్చిన తరువాతే పవార్ తన నిర్ణయాన్ని వెల్లడించే అవకాశాలున్నాయి. సర్వోన్నత న్యాయస్థానం జనవరి 22న వెలువరించిన తీర్పులో మరో ఆరు వారాల్లో బీసీసీఐ ఎన్నికల జరపాలని ఆదేశాలు జారీ చేయడంతో ఇప్పుడు బీసీసీఐ అధికారులందరూ ఆ పనులలో నిమగ్నమయ్యారు.

జి.మనోహర్