తొలి టెస్టులోనే కుమ్మేశాడు..

Posted: 11/07/2013 10:46 AM IST

ఇంత వరకు భారత్ ఎన్నో టెస్టు సిరీస్ లు గెలిచింది. టెస్టుల్లో టాప్ జట్లను ఓడించింది. కానీ విండీస్ తో జరుగుతున్న ఈ టెస్టు సిరీస్ ఎంతో ప్రతిష్టాత్మకమైందని చెప్పాలి. ఎందుకంటే గత రెండు దశాబ్దాల నుండి క్రికెట్ అభిమానుల ఆరాధ్య దైవం అయిన మాస్టర్ బ్లాస్టర్ ఆడుతున్న చివరి సిరీస్. కాబట్టి అందరి చూపు దీని పైనే ఉంది.

సచిన్ ఫేర్ వెల్ సిరీస్ గా చెప్పుకుంటున్న ఈ సిరీస్ నిన్న కోల్ కత్తాలో ప్రారంభం అయింది. తొలి టెస్టులో భాగంగా టాస్ గెలిచి బ్యాటింగ్ ఎంచుకున్న విస్టిండీస్ పై మొదటి రోజు ఆధిపత్యాన్ని కొనసాగించింది. ఈడెన్ లో తొలి టెస్టు ఆడుతున్న 23 ఏళ్ల మహ్మద్ షమీ మెరుపు బంతులకు విండీస్ బ్యాట్స్ మెన్స్ బెంబేలెత్తించారు. విండీస్ బ్యాట్స్ మెన్స్ లో భారీ హిట్టర్లున్నా భారత బౌలర్ల ప్రదర్శన ముందు చేతులెత్తేశారు.

తొలి ఇన్నింగ్స్‌లో 78 ఓవర్లలో 234 పరుగులకు ఆలౌటైంది. శామ్యూల్స్ (65) ఒంటరిపోరాటం చేయగా, చందర్‌పాల్ (36), పావెల్ (28) ఓ మోస్తరుగా ఆడారు. 138/2 స్కోరుతో పటిష్ట స్థితిలో ఉన్న విండీస్ 96 పరుగుల తేడాతో చివరి 8 వికెట్లను కోల్పోవడం దెబ్బతీసింది.

షమీ నాలుగు వికెట్లతో ఆకట్టుకోగా, అశ్విన్‌కు 2 వికెట్లు దక్కాయి. ఆ తరువాత బ్యాటింగ్ ఆరంభించిన భారత్ ఆట ముగిసే సమయానికి ధావన్ (21 బ్యాటింగ్), విజయ్ (16 బ్యాటింగ్) క్రీజులో ఉన్నారు. మ్యాచ్ ప్రారంభానికి ముందు ఇరుజట్ల ఆటగాళ్లు మైదానంలో వరుసగా నిలబడి సచిన్‌కు గౌరవ అభివాదం చేశారు.