సంగా చించేశాడు... లంకను గెలిపించాడు

Posted: 07/09/2013 10:16 AM IST

 సిలికాన్ కప్ ముక్కోణపు సిరీస్ లో భాగంగా విండీస్ లో జరుగుతున్న ఈ సిరీస్ లో సొంత గడ్డ పై విండీస్ కు శ్రీలంక గట్టి షాక్ ని ఇచ్చింది. ట్రై సిరీస్ లీగ్ మ్యాచ్ లో భాగంగా మొన్న జరగాల్సిన మ్యాచ్ వర్షం కారణంగా  నిన్నిటికి వాయిదా పడిన విషయం తెలిసిందే. మొన్న 19 ఓవర్ల మధ్యలో ఆపేసిన మ్యాచ్ ని నిన్న కొనసాగించారు. 19 ఓవర్ల 3 వికెట్ల నష్టానికి 60 పరుగులతో ఆట మొదలు పెట్టిన శ్రీలంక 41 ఓవర్లలో 219 పరుగులు చేసింది. డక్ వర్త్ లూయీస్ పద్దతి ప్రకారం విండీస్ లక్ష్యాన్ని 41 ఓవర్లలో 230 పరుగుల నిర్ణయించారు. 230 పరుగుల లక్ష్యంతో బ్యాటింగ్ ప్రారంభించిన విండీస్ జట్టుకు ఆదిలోనే ఎదురెబ్బ తగిలింది. ఓపెనర్లు క్రిస్ గేల్, చార్లెస్ వికెట్లను ఆరంభంలోనే కోల్పోవడంతో పరుగుల వేగం మందగించింది. లక్ష్య ఛేదనలో పరుగుల వేగాన్ని పెంచే క్రమంలో 31 పరుగులకే నాలుగు వికెట్లను కోల్పోయింది. కాని మిడిల్ ఆర్డర్ లో బ్రావో (70), సిమన్స్ (67) పరుగులతో వికెట్ల పతనాన్ని అడ్డుకున్నారు. ఆతర్వాత బ్రావో, చార్లెస్ వికెట్లు వెంట వెంటనే కోల్పోవడంతో విండీస్ పరాజయం బాటలోనే నడిచింది. చివరకు 41 ఓవర్లలో 9 వికెట్లు కోల్పోయి 190 పరుగులకే పరిమితమవ్వడంతో 39 పరుగుల తేడాతో ఓటమి పాలైంది. 60 పరుగులకే మూడు వికెట్లు కోల్పోయిన లంకను సంగక్కర చివరి వరకు నిలిచి 90 పరుగుల చేసి ఆదుకున్నాడు. శ్రీలంక జట్టులో మ్యాథ్యూస్ 4, ఎర్రంగ 3, మలింగ 2 వికెట్లు పడగొట్టారు. శ్రీలంక విజయంలో కీలక పాత్ర పోషించిన సంగక్కరకు మ్యాన్ ఆఫ్ ది మ్యాచ్ అవార్డు లభించింది.