Posted: 02/24/2013 03:41 PM IST

వందో టెస్టు ఆడుతున్న సీనియర్ ఆఫ్ స్పిన్నర్ హర్భజన్ సింగ్‌ను వినియోగించుకునే విషయంలో కెప్టెన్ ధోనిని మాజీ క్రికెటర్ వీవీఎస్ లక్ష్మణ్ తప్పుపట్టాడు. ఇంగ్లండ్ తొలి ఇన్నింగ్స్‌లో భజ్జీ కే వలం 25 ఓవర్లు మాత్రమే బౌలింగ్ చేసి ఒక వికెట్ తీశాడు. మరోవైపు జడేజా 36 ఓవర్లు వేసి రెండు వికెట్లు తీశాడు. హర్భజన్ ఓ దశలో 200 నిమిషాలపాటు బౌలింగ్‌కు దూరంగా ఉన్నాడు. తొలి రోజు టీ విరామానికి 20 నిమిషాల ముందు తన చివరి ఓవర్ వేశాడు. సిడెల్ వికెట్ తీసిన అనంతరం మరో ఓవర్ వేశాక తిరిగి బౌలింగ్ చేసే అవకాశం దక్కలేదు. అలాగే ఇంగ్లండ్‌తో ముంబైలో జరిగిన టెస్టులో కూడా అశ్విన్, ఓజాలకన్నా సగం ఓవర్లే బౌలింగ్ చేశాడు. ‘ధోని వ్యూహాలు నన్ను ఆశ్చర్యానికి గురి చేశాయి. జట్టులోని స్పిన్నర్లను పూర్తి స్థాయిలో ఉపయోగించుకోవాల్సి ఉంది. ఇలాంటి తరుణంలో శుక్రవారం టీ సమయం నుంచి భజ్జీని బౌలింగ్‌కు దూరంగా ఉంచడం నిజంగా దారుణం. ఏ బౌలర్ విషయంలో బ్యాట్స్‌మన్ ఇబ్బంది పడుతున్నాడో కెప్టెన్‌కు తెలిసి ఉండాలి.

ఇలాంటి వ్యూహంతో హర్భజన్ ఆత్మవిశ్వాసం దెబ్బతింటుంది.  తన సామర్థ్యాన్ని కెప్టెన్ నమ్మడం లేదని అతడికి తెలిసిపోయింది. అలాగే రిథమ్‌ను అందుకునేందుకు తనకు ఎక్కువ ఓవర్లు బౌలింగ్ చేసే అవకాశం రావడం లేదు. ఇంకా చాలా ఆట మిగిలి ఉంది. మున్ముందు కీలక పాత్ర పోషిస్తాడనే నమ్మకం ఉంది. అందుకే భజ్జీకి ఆత్మవిశ్వాసం కలిగించాలి. బౌలింగ్ అవకాశం ఇవ్వకపోతే అతడికి తప్పుడు సంకేతాలు పంపినట్టవుతుంది. తనేమీ కొత్త బౌలర్ కాదు. వందో టెస్టు ఆడుతున్నాడు. కాస్త ధైర్యాన్ని అందిస్తే జట్టుకు సహాయపడగలడు’ అని స్టార్ క్రికెట్ కామెంటరీలో లక్ష్మణ్ అన్నాడు.