Posted: 02/09/2013 04:09 PM IST

టోర్నీ ఏదైనా మాస్టర్ బ్లాస్టర్ సచిన్ టెండూల్కర్ రికార్డుల మోత మోగిస్తూనే ఉన్నాడు. ‘శతక్కొట్టడం’లో తన తర్వాతే ఎవరైనా అని మాస్టర్ మరోసారి నిరూపించుకున్నాడు. కీలకమైన ఆస్ట్రేలియా పర్యటనకు ముందు దేశవాళీ టోర్నీలో సత్తా చాటి ఆత్మవిశ్వాసాన్ని ప్రోది చేసుకున్నాడు. ఇరానీ కప్‌లో సచిన్ సెంచరీ చేసి తనలో చేవ తగ్గలేదని సంకేతాలిచ్చాడు.  రెస్టాఫ్ ఇండియాతో జరుగుతున్న ఇరానీ కప్‌లో అజేయ శతకం (197 బంతుల్లో 140 నాటౌట్; 18 ఫోర్లు; 2 సిక్స్) సాధించిన మాస్టర్ ఫస్ట్ క్లాస్‌లో 81 సెంచరీలు పూర్తి చేసుకున్నాడు. దీంతో భారత్ తరఫున ఫస్ట్‌క్లాస్ క్రికెట్‌లో అత్యధిక సెంచరీలు సాధించిన సునీల్ గవాస్కర్ సరసన నిలిచాడు. టెస్టుల్లో 51 శతకాలు చేసిన సచిన్‌కిది 30వ దేశవాళీ సెంచరీ కావడం విశేషం. అలాగే ఫస్ట్ క్లాస్‌లో 25 వేల పరుగులు పూర్తి చేశాడు.