Posted: 10/30/2012 12:58 PM IST

రాష్ట్ర రాజధాని నగరం క్రీడా శోభను సంతరించుకుంది. జాతీయ సీనియర్ పురుషుల బాక్సింగ్ చాంపియన్‌షిప్‌ సందడి ఎల్బీ స్డేడియంలో మొదలైపోయింది. నేటి నుంచి నవంబర్ 4 వరకు నగర బాక్సింగ్ అభిమానులను ఈ పోటీలు కనువిందు చేయనున్నాయి. ఇందుకుగాను స్టేడియంలో ప్రత్యేకంగా రెండు బాక్సింగ్ రింగ్‌లను ఏర్పాటు చేశారు. దాదాపు 12,000 మంది ప్రేక్ష కులు ప్రత్యక్షంగా తిలకించేందుకు ఏర్పాట్లు చేశారు. సోమవారం సాయంత్రం కోచ్, మేనేజర్ల సమావేశాన్ని భారత బాక్సింగ్ సమాఖ్య కార్యదర్శి రాజేశ్ భండారి నిర్వహించారు. దేశవ్యాప్తంగా అన్ని రాష్ట్రాలు, కేంద్రపాలిత ప్రాంతాలతో పాటు స్టీల్ ప్లాంట్, రైల్వేస్, సర్వీసెస్, ఆలిండియా పోలీస్ లాంటి కేంద్ర ప్రభుత్వ సంస్థలకు చెందిన 36 జట్ల నుంచి సుమారు 350 మంది బాక్సర్లు సోమవారం ఉదయం నగరానికి చేరుకున్నారు. ఇవాళ రాష్ట్ర గవర్నర్ నరసింహన్ ఈ పోటీలను ఆరంభించారు. జాతీయ బాక్సర్, ఖేల్ రత్న అవార్డు గ్రహీత విజేందర్ సింగ్ ఈ పోటీలకు ప్రత్యేక అతిథిగా రానున్నాడు.
    కాగా,  తమిళనాడులో జరిగిన గత టోర్నీలో విజేత, రన్నరప్‌లుగా నిలిచిన రైల్వేస్, సర్వీసెస్ జట్లకు చెందిన బాక్సర్లు ఈసారి హాట్ ఫేవరెట్‌లుగా బరిలోకి దిగనున్నారు. ఈ పోటీల నిర్వాహక కమిటీ చైర్మన్ హోదాలో మంత్రి దానం నాగేందర్ గత వారం రోజులుగా ఏర్పాట్లను పర్యవేక్షిస్తున్నారు.
      ఇక్కడ సీడింగ్‌లు లేకపోవడంతో అంతర్జాతీయ స్థాయి బాక్సర్లు తొలి రౌండ్‌లో తలపడే అవకాశాలు ఉన్నాయి. ఆంధ్రప్రదేశ్ విషయానికి వస్తే సూపర్ హెవీ వెయిట్‌లో జాతీయ యూత్ స్వర్ణ పతక విజేత త్రివిక్రమ్ దేవ్‌పైనే గంపెడు ఆశలు ఉన్నాయి. ఇతనితో పాటు లోకేష్ రాజ్ (మిడిల్ వెయిట్), సురేందర్ (వెల్టర్ వెయిట్) కూడా చక్కని ప్రతిభ ఉన్న బాక్సర్లుగా ప్రస్తుతం మంచి ఫాంలో ఉన్నారు.

...avnk