Posted: 09/26/2012 07:58 PM IST

టి-20 ప్రపంచ కప్ గ్రూప్ దశ నేటితో ముగుస్తోంది. కీలక సూపర్-8 సమరానికి తెరలేవనుంది. టీమిండియాకిక అన్నీ సవాళ్లే. నాకౌట్ చేరాలంటే ప్రతీ మ్యాచ్, రన్‌రేట్ అన్నీ కీలకమే. గ్రూప్ దశలో మాదిరిగా ఆషామాషీ ప్రత్యర్థులు కాదు. పటిష్టమైన దక్షిణాఫ్రికా, ఆస్ట్రేలియా ఎదురుపడ్డాయి. చిరకాల ప్రత్యర్థి పాక్‌తో పోరూ దాదాపు ఖాయం అయింది.. రసవత్తర పోరులో సెమీస్ చేరేది రెండు జట్లే కనుక ధోనీసేన బెర్తు సొంతం చేసుకోవాలంటే చెలరేగాల్సిందే. గ్రూప్ దశలో సంచలనాలేమీ నమోదు కాలేదు.

పసికూనలు ఇంటిదారి పట్టగా, టాప్ జట్లు సూపర్-8 చేరాయి. సూపర్-8 దశలో..లీగ్ దశనుంచి వచ్చిన 8 జట్లను రెండు గ్రూప్‌లుగా విభజిస్తారు. రెండు విజయాలతో గ్రూప్-ఎ టాపర్‌గా నిలిచిన టీమిండియా.. సూపర్-8 పోరులో గ్రూప్- 2లో ఆడనుంది. ఇదే గ్రూప్‌లో బలమైన ఆస్ట్రేలియా, దక్షిణాఫ్రికా ఉన్నాయి. బెర్తు సాదించిన పాక్ కూడా ఇదే గ్రూప్‌లో ఉంది. ఇ క గ్రూప్-1లో ఇంగ్లండ్, శ్రీలంక, న్యూజిలాండ్, వెస్టిండీస్ ఉ న్నా యి. ఒక్కో గ్రూప్ నుంచి టాప్-2 జట్లు సెమీస్‌కు అర్హత సాధిస్తా యి. గ్రూపు-1తో పోలిస్తే గ్రూప్-2 పోరే క్లిష్టంగా కనిపిస్తోంది. సూపర్ పోరులో ధోనీసేన.. ఆసీస్, సౌతాఫ్రికా, పాక్ తో ఒక్కో మ్యాచ్ ఆడనుంది. నాకౌట్ చేరాలంటే కనీసం రెండు మ్యాచ్‌ల్లో గెలవాల్సి ఉంటుంది. పొట్టి కప్‌లో దాయాదాల పోరు అభిమానులకు కనుల పండుగే.