Posted: 08/28/2012 08:39 PM IST

క్లిష్ట పరిస్థితుల్లో వీరోచిత ఇన్నింగ్స్‌తో యువ భారత జట్టును అండర్-19 చాంపియన్‌గా నిలిపిన కెప్టెన్ ఉన్ముక్త్ చంద్‌లో అసాధారణ ప్రతిభ దాగుందని అతని కోచ్ సంజయ్ భరద్వాజ్ అంటున్నాడు. ప్రస్తుతం టీమిండియాలో స్టార్ ఓపెనర్‌గా ఉన్న గౌతమ్ గంభీర్ కూడా సంజయ్ శిక్షణలోనే అంతర్జాతీయ స్థాయికి ఎదిగాడు. అయితే ఈ ఇద్దరు ప్రియ శిష్యులను ఒకరితో ఒకరిని పోల్చడం కష్టమే అంటున్న భరద్వాజ్.. ఉన్ముక్త్ మాత్రం గంభీర్‌కన్నా ప్రతిభావంతమైన ఆటగాడని కితాబిచ్చాడు. 'ఉన్ముక్త్ ప్రతిభతోపాటు కష్టపడే తత్వం కలబోసిన ఆటగాడు.అతని కెరీర్ గ్రాఫ్ చూస్తే అది అర్థమవుతుంది. వచ్చిన ప్రతి అవకాశాన్నీ రెండు చేతుల్తో అందిపుచ్చుకుంటాడు. గంభీర్ అద్భుతమైన ఆటగాడే అయినా..

ఈ వయసులో ఉన్ముక్త్ అంత ప్రతిభ కనబర్చలేదు. అయితే ఈ ఇద్దరికీ కోచ్‌గా వ్యవహరించినందుకు చాలా గర్వంగా ఉంది. వాళ్ల ఆటతీరు మెరుగయ్యేందుకు సలహాలు మాత్రమే ఇచ్చాను. వారిలోని అంకితభావం, పట్టుదలే వారిని ఈ స్థాయికి చేర్చాయి' అని భరద్వాజ్ అన్నాడు. ఉన్ముక్త్‌కు సీనియర్ జట్టులో చాన్స్‌పై స్పందిస్తూ.. 'వచ్చే ఏడాది ఆరంభానికల్లా ఉన్ముక్త్ జాతీయ జట్టులో ఉండొచ్చు. అయితే అంతకంటే ముందు అతడు మరింత నిరూపించుకోవాలి. నిలకడ ప్రదర్శించాల్సి ఉంద'ని చెప్పాడు.