Posted: 12/12/2012 05:36 PM IST

మల్టీ టాలెంట్ ఉన్న అందాల సుందరి మమతా మోహన్ దాస్ 12.12.12 రోజున వార్తల్లోకి ఎక్కి అందరిని ఆశ్చర్యపరిచింది. ఇది అభిమానులకు ఒక రకమైన షాకింగ్ న్యూసే. పోయిన సంవత్సరం 11.11.11 స్పెషల్ డే రోజున నిశ్చితార్థం చేసుకున్న ఈ అమ్మడు 12.12.12 రోజున విడాకులు తీసుకుంటున్నట్లు మీడియాకు ప్రకటించింది. ఈ స్పెషల్ తేదీ రోజు ఏదైనా మంచి పని చేస్తే అంతా శుభం అని భావిస్తారు. కానీ మమతా మోహన్ దాస్ కి ఈ స్పెషల్ తేదీ కలిసి రాలేదనే చెప్పాలి. పెళ్ళయి ఏడాది గడవక ముందే ఈ అమ్మడు విడాకులు తీసుకుంటున్నట్లు ప్రకటించి అందరికి షాక్ ఇచ్చింది. తన చిన్ననాటి స్నేహితుడు పద్మనాభన్ ని పెళ్లి చేసుకున్న మోహన్ దాస్ "మా ఇద్దరి మనస్తత్వాలు వేరని మా ఇద్దరికీ అర్ధమైపోయింది. అలాంటప్పుడు కలిసి కాపురం చేయలేమని నిశ్చయించుకున్నాం. అందుకే, విడాకులు తీసుకోవాలని ఇద్దరం నిర్ణయించుకున్నాం. అందుకు సంబంధించిన న్యాయపరమైన ప్రక్రియ త్వరలో ప్రారంభమవుతుంది" అని మమత మోహన్ దాస్ వెల్లడించింది. మళయాళ భామ అయిన మోహన్ దాస్ తెలుగులో పలువురు స్టార్ హీరోలతో నటించడమే కాకుండా, చిరంజీవి సినిమాలో ఓ పాట కూడా పాడి మంచి గుర్తింపును తెచ్చుకుంది. కొన్ని రోజుల క్రితం కేన్సర్ కి గురై, దాని బారి నుండి బయటపడిన ఈ అమ్మడు జీవితం ఇలా మారడం అభిమానులను నిరాశ పరిచింది.