‘భాగ్యనగర వీధుల్లో గమ్మత్తు’ ట్రైలర్.. కామెడీ అదుర్స్

Posted: 11/20/2019 10:00 PM IST

Bhagyanagara veedullo gammathu trailer hilarious parodies galore

కామెడీయన్ నటుడిగా తనకంటూ ఓ ప్రాముఖ్యతను, ప్రత్యేకతను సంపాదించుకుంటున్న నటుడు శ్రీనివాస్ రెడ్డి.. తన స్వియ నిర్మాణ, దర్శకత్వంలో రూపోందించిన కామెడీ ఎంటర్ టైనర్ చిత్రం ‘భాగ్యనగర వీధుల్లో గమ్మత్తు’. తొలిసారిగా ఆయన మెగాఫోన్ పట్టడంతో పాటు ఫ్ల‌యింగ్ క‌ల‌ర్స్ ఎంట‌ర్‌టైన్‌మెంట్ ప్రొడ‌క్ష‌న్స్ బ్యాన‌ర్ ను ఏర్పాటు చేసి.. దానిద్వారా చిత్రాన్ని నిర్మించారు. ఈ చిత్రానికి సంబంధించిన ట్రయిలర్ ను ఇవాళ మెగా ప్రిన్స్ వరుణ్ తేజ్ విడుదల చేశారు.

దర్శకనిర్మాత శ్రీనివాస‌రెడ్డి తో పాటు ఈ చిత్రంలో స‌త్య‌, ష‌క‌ల‌క శంక‌ర్ ప్ర‌ధాన పాత్ర‌ధారులు నటిస్తున్నారు. ఔట్ అండ్ ఔట్ ఎంట‌ర్ టైన‌ర్‌గా రూపొందుతోన్న ఈ సినిమా ట్రైల‌ర్ అభిమానులను అకట్టుకుంటోంది. కామెడీని పండించడమే పనిగా పెట్టుకున్న శ్రీనివాస్ రెడ్డి.. సినిమా ట్రైల‌ర్ ను కూడా చాలా ధ్రిల్లింగ్ గా కట్ చేశారు. ట్రైలర్ విడుదల సందర్భంగా.. సినిమా ఇంత‌కు మించిన వినోదాత్మకంగా ఉంటుంద‌ని భావిస్తున్నానని వరుణ్ తేజ్ అన్నారు. సినిమా చాలా పెద్ద హిట్ కావాలంటూ యూనిట్ మొత్తానికి అభినంద‌న‌లు తెలిపారు.

ప్ర‌స్తుతం ఈ సినిమా పోస్ట్ ప్రొడ‌క్ష‌న్ కార్య‌క్ర‌మాలు పూర్త‌య్యాయి. డిసెంబ‌ర్ 6న సినిమాను విడుద‌ల చేస్తున్నారు. హిట్ చిత్రాల నిర్మాత దిల్‌రాజు ఈ చిత్రాన్ని విడుద‌ల చేస్తున్నారు. `జ‌య‌మ్ము నిశ్చ‌య‌మ్మురా` ర‌చ‌యిత ప‌రం సూర్యాన్షు ఈ సినిమాకు క‌థ‌, మాట‌లు, స్క్రీన్‌ప్లేను అందించారు. చిత్రంలో వెన్నెల‌కిషోర్ పోలీస్ గెటప్ లో కామెడీ పండించనున్నారు. ఆయనతో పాటు స‌త్యం రాజేశ్‌, ర‌ఘుబాబు, ప్ర‌వీణ్‌ త‌దిత‌రులు కూడా ప్రేక్షకులను నవ్వించనున్నారు.