అన్నయ్య పెళ్లి వార్తలపై చెల్లెలి ఆగ్రహం

Posted: 10/20/2015 04:45 PM IST

బాలీవుడ్ హీరో సల్మాన్ ఖాన్ పెళ్లి విషయంపై రోజుకో వార్త వస్తున్న విషయం తెలిసిందే. సల్మాన్ ఖాన్ రుమేనియా టీవి స్టార్ లులియా వంటూర్ తో గతకొద్దికాలంగా ప్రేమాయణం కొనసాగిస్తున్నాడని వార్తలొస్తున్నాయి. అంతేకాకుండా త్వరలోనే లులియాను సల్మాన్ పెళ్లి చేసుకోబోతున్నాడని మొన్నటి వరకు వార్తలొచ్చాయి.

కానీ గత వారం రోజుల నుంచి సల్మాన్ నిశ్చితార్థం లులియాతో రహస్యంగా జరిగిందంటూ వార్తలొస్తున్నాయి. ఈ వార్తలను సల్మాన్ చెల్లెలు అర్పిత ఖండించింది. అంతేకాకుండా ఇలాంటి పుకార్లను క్రియేట్ చేసేవారిపై అర్పిత తన ఆగ్రహం వ్యక్తం చేసింది.

ఈ విషయంపై అర్పిత తన సోషల్ మీడియా ట్విట్టర్ లో స్పందిస్తూ... పత్రికల్లో, వెబ్ సైట్లలో వచ్చిన ఇలాంటి రబ్బిష్ వార్తలను నమ్మవద్దని, ఇలాంటి వార్తలు ఎందుకు రాస్తారో అంటూ అర్పిత ఆగ్రహం వ్యక్తం చేసింది. అర్పిత స్పందనతో సల్మాన్ నిశ్చితార్థం వార్తలను కేవలం పుకార్లేనని తేలిపోయింది.