కోకాపేటలో గోపిచంద్ నయనతారల యాక్షన్

Posted: 05/08/2015 10:32 AM IST

‘లౌక్యం’, ‘జిల్’ వంటి వరుస హిట్ చిత్రాలతో దూసుకుపోతున్న గోపిచంద్ మరోసారి హిట్ కొట్టడానికి సిద్ధమయ్యాడు. ఆగిపోయిన ప్రాజెక్టును మళ్లీ కొత్తగా మొదలుపెట్టేసాడు. ‘జిల్’ సినిమా తర్వాత గోపిచంద్ హీరోగా ప్రముఖ మాస్ చిత్రాల దర్శకుడు బి.గోపాల్ దర్శకత్వంలో ఓ చిత్రం చేస్తున్నాడు.

నిజానికి ఈ చిత్రం ఎప్పుడో ప్రారంభమై మళ్లీ ఆగిపోయింది. ఎన్నో అవంతరాలను ఎదుర్కొని మళ్లీ తాజాగా ప్రారంభమయ్యింది. గోపిచంద్ సరసన నయనతార హీరోయిన్ గా నటిస్తుంది. ప్రస్తుతం ఈ చిత్ర షూటింగ్ శరవేగంగా జరుగుతోంది. తెలుగు, తమిళ భాషల్లో ఏకకాలంలో రూపొందుతున్న ఈ చిత్రాన్ని టి.రమేష్ నిర్మిస్తున్నారు.

కోకాపేట పరిసర ప్రాంతాల్లో షూటింగ్ జరుగుతోంది. తాజాగా నయనతార కూడా షూటింగ్ లో పాల్గొన్నట్లుగా తెలిసింది. మణిశర్మ సంగీతం అందిస్తున్నాడు. దాదాపు ‘అనామిక’ తర్వాత నయనతార నటిస్తున్న తెలుగు చిత్రం ఇదే కానుంది. ఈ చిత్రాన్ని ఆగష్టులో విడుదల చేయడానికి సన్నాహాలు చేస్తున్నారు. త్వరలోనే అన్ని వివరాలు అధికారికంగా ప్రకటించనున్నారు.