బాబుకు తలసాని ‘దమ్ము’ సవాల్..

Posted: 02/10/2015 11:33 AM IST

నిన్నటివరకు టీడీపీ పార్టీ నేతగా కొనసాగిన తలసాని శ్రీనివాస్ యాదవ్.. ఇటీవలే టీఆర్ఎస్ తీర్థం పుచ్చుకున్న విషయం తెలిసిందే! ప్రస్తుతం ఆయన తెలంగాణ వాణిజ్య పన్నుల శాఖ మంత్రిగా బాధ్యతలు వహిస్తున్నారు. ఇదిలావుండగా.. టీడీపీ పార్టీలో వున్నప్పుడు ఆ పార్టీ అధ్యక్షుడు, ఏపీ సీఎం చంద్రబాబును గురువుగా భావించడంతోపాటు ఆయనపై ప్రశంసల వర్షం కురిపించేవారు. కానీ.. టీఆర్ఎస్ పార్టీలో జంప్ అయిన తర్వాత ఇప్పుడు ఆ గురువుపైనే విమర్శలు, ఆరోపణలు చేస్తున్నారు. మొన్నటివరకు రాజకీయ పాఠాలు నేర్పించిన బాబుపైనే ఇప్పుడు సవాల్ విసురుతున్నారు. మొత్తానికి చెప్పాలంటే.. తలసాని పార్టీ మారిన తర్వాత టీడీపీకి బద్ధ విరోధిలా మారిపోయారు.

తాజాగా కుత్బుల్లాపూర్ నియోజకవర్గ పరిధిలో టీఆర్ఎస్ సభ్యత్వ నమోదు కార్యక్రమాన్ని ప్రారంభించిన తలసాని.. ఈ సందర్భంగానే చంద్రబాబుపై విచురుకుపడ్డారు. దమ్ముంటే తనపై పోటీ చేయాలని ఆయన బాబుకు సవాల్ విసిరారు. తనకున్న ప్రజాబలంతో బాబునే ఓడించగలనన్న నమ్మకాన్ని ఆయన వ్యక్తం చేస్తూ ఇలా కామెంట్లు చేశారు. ఈ నేపథ్యంలోనే ఆయన మాట్లాడుతూ..

* చంద్రబాబు షో పుటప్ చేస్తున్నాడని తలసాని విమర్శించారు.
* తాను టీడీపీలో వున్నప్పుడు టీఆర్ఎస్ సర్కారును ఇరుకున పెట్టేవిధంగా మాట్లాడాలని బాబు చెప్పినట్లు ఆయన అన్నారు.
* అయితే.. టీఆర్ఎస్’కు విరుద్ధంగా తాను ఎటువంటి విమర్శలు చేయనంటూ మూడుసార్లు తిరస్కరించినట్లు వెల్లడించారు.
* టీఆర్ఎస్ పార్టీతో బాబు భయపడుతున్నారని తెలిపిన తలసాని.. సనత్ నగర్ నియోజకవర్గం నుంచి మళ్లీ ఎన్నికల బరిలోకి దిగేందుకు తాను సిద్ధంగా వున్నానని, దమ్ముంటే తనపై పోటీ చేయాలని బాబుకు సవాల్ విసిరారు.