Posted: 03/09/2013 05:59 PM IST

పిల్ల పుట్టగానే తల్లీ పుడుతుంది – భగవాన్ రజనీష్

పిల్లపుట్టగానే తల్లీ పుడుతుంది.  అంతకు ముందు తల్లి కాదు ఒక స్త్రీ మాత్రమే.  మాతృత్వం కొత్తగా పుట్టిందే.  పిల్లను కనటంతోనే తల్లిగా మరో జన్మనెత్తుతుంది.  అంటారు భగవాన్ రజనీష్.  

ఇది ఒక్క తల్లీ పిల్లలు కలిసి అవతరించేదే కాదు.  ఇంకా చాలా సంబంధాలలో అలాగే జరుగుతుంది.  భార్య లేక భర్త లేడు, భర్త లేక భార్య లేదు, శిష్యులు లేక గురువు లేడు, దానం తీసుకునేవాడు లేకపోతే దాత లేడు.

మనకు తల్లి తండ్రి, గురు స్థానమిచ్చినవారి పట్ల మనం కృతఙతతో మెలుగుతూ వారిపట్ల మన బాధ్యతలను నెరవేర్చాలి.  పెద్ద ఎత్తున అలంకరణలు ఆర్భాటాలు చేసి వేడుక చేసుకోవాలనుకున్నప్పుడు పిలిచిన అతిథులు రాకపోతే ఎలావుంటుంది.  వెలవెలబోతుంది కదా.  అందుకే అతిథులు చాలా ముఖ్యులు.  దానమివ్వాలన్నది ఒక ఆచారంగా అలవాటుగా దినచర్యగా పెట్టుకుని ఆ పని చేసిన తర్వాతనే తను తినే నియమం పెట్టుకున్నప్పుడు ఎవరూ ఇంటికి ముందుకు అడగటానికి రాకపోతే ఎంతగా ఎదురు చూడటం జరుగుతుంది.  ఆ సమయంలో ఎవరైనా వస్తే ఎంత ఆనందంగా ఉంటుంది.

అందుకే తల్లికి బిడ్డ మీద అంత ప్రేమ.  తనకి మాతృత్వాన్ని అందించినందుకు కృతఙతా పూర్వకమైన ప్రేమను భాషలో పెట్టలేక ముద్దులతో ముంచేస్తుంది తల్లి.  అదేవిధంగా అన్ని బందాలలోనూ కృతఙతను కలిగి ప్రవర్తించటం ప్రేమను సాధించటానికి మొదటి మెట్టు.  

ప్రతిరోజూ ఉదయం లేవగానే అందరికీ మనసులోనే కృతఙతలు చెప్పుకునే అలవాటు చాలా మంచిది.  మనం తింటున్న ఆహారాన్ని ఎవరు పండించారో, మనం ఉంటున్న ఇంటిలో ఎందరి శ్రమ ఉందో, మనం వాడుతున్న వస్తువులను కనిపెట్టినవాళ్ళు, తయారు చేసినవారు, స్టాకు పెట్టినవారు, రిటైల్ లో అమ్మినవారు, ఇంటికి తరలించినవారు ఇలా జీవితంలో అఙాతంగా మనకోసం పనిచేసినవారెందరో ఉన్నారు. వారందరి పట్లా కృతఙతను తెలుపుకుంటూ, ప్రతిగా నావంతు సేవ నేనూ చేస్తాను అని దినచర్యలోకి పోవటంలో ఆనందం ఉంటుంది, తృప్తీ కలుగుతుంది, నిరాశా నిస్పృహలకు దూరంగా ఉంటాము, శక్తి వంచన లేకుండా సమాజంలో మన వాటా శ్రమను అందజేస్తాము.

-శ్రీజ