జగన్‌కు పోటీగా రాజన్న దళం

Posted: 11/06/2013 08:38 PM IST

వైఎస్ జగన్ కు నెల్లూరు జిల్లాలో ఆ పార్టీ నేతలు షాక్ ఇచ్చారు. పలువురు అసంతృప్తి నేతలు 'రాజన్న దళం' పేరిట కొత్త పార్టీని ఈరోజు లాంఛనంగా ప్రారంభించారు. ఈ సందర్భంగా రాజన్న దళం నేత చిరంజీవి రెడ్డి మీడియాతో మాట్లాడుతూ త్వరలో ఎన్నికల సంఘంలో పార్టీ పేరును రిజిష్టర్ చేస్తామని అన్నారు. వచ్చే ఎన్నికల్లో అన్ని ప్రాంతాల నుంచి పోటీ చేస్తామని ఆయన తెలిపారు. తమకు వైఎస్ అభిమానులు పలువురు ప్రొత్సహిస్తున్నారని ఆయన చెప్పారు. తమకు జగన్ పార్టీలో ప్రాధాన్యత లేదని, తమ కష్టాన్ని అధిష్టానం గుర్తించడం లేదని వారు ఆవేదన వ్యక్తం చేశారు. అందుకే రాజన్న దళం పార్టీని లాంఛనంగా ప్రారంభించినట్లు చెప్పారు.

నెల్లూరు జిల్లాకు చెందిన సీనియర్ పార్లమెంటు సభ్యులు మేకపాటి రాజమోహన్ రెడ్డి, ఆయన సోదరుడు, ఎమ్మెల్యే మేకపాటి చంద్రశేఖర్ రెడ్డితో విభేదాల కారణంగా పలువురు నేతలు పార్టీ నుండి సస్పెండయ్యారు. వారు ఒక్కొక్కరుగా  రాజన్న దళం పేరుతో కొత్త పార్టీకి శ్రీకారం చుట్టారు. విభేదాల కారణంగా మెట్టుకూరి చిరంజీవి రెడ్డి సహా నలుగురిని వైఎస్ఆర్ కాంగ్రెస్ పార్టీ సస్పెండ్ చేసిన విషయం తెలిసిందే.  వీరు ఇటీవల పంచాయతీ ఎన్నికల్లో పోటీ చేసి గెలుపొందారు. తమలాంటి అసంతృప్త నేతలను ఒకే గొడుకు కిందకు తీసుకు రావాలని వారు భావిస్తున్నట్లు చెబుతున్నారు.  

రాజన్న దళం పార్టీపై వైఎస్ జగన్ ఎలాంటి నిర్ణయం తీసుకుంటారో చూడాలి. మెట్టూకురి చిరంజీవి రెడ్డి వెనుక ఎవరైన రాజకీయ నాయకులు ఉన్నారా? అనే కోణంలో.. వైఎస్ఆర్ కాంగ్రెస్ పార్టీలోని సీనియర్ నాయకులు ఆలోచిస్తున్నారు. ఒకవేళ రాజన్నదళం పేరుతో పార్టీ వస్తే మాత్రం.. జగన్ పార్టీకి కొంత మేర నష్టం జరిగే అవకాశాలు ఉన్నాయని రాజకీయ నిపుణులు అంటున్నారు.