తుదిమెరుగులు దిద్దుతున్న కేసిఆర్

Posted: 11/01/2013 12:42 PM IST

కేంద్రం హైకమాండ్ మాటల్లో మళ్లీ అఖిల పక్షం అనే మాటలు వినబడే సరికి టీఆర్‌ఎస్ అధినేత కె.చంద్రశేఖర్‌రావు లో కొత్త అలజడి మొదలైంది. హైదరాబాద్ శాంతిభద్రతల అంశంపై ఎట్టి పరిస్థితుల్లో రాజీ పడవద్దని టీఆర్‌ఎస్ అధినేత కె.చంద్రశేఖర్‌రావు పార్టీ నేతలకు సూచించారు. ఆ విషయంలో కచ్చితంగా, నిర్దిష్టంగా ఉండాలన్నారు. తెలంగాణపై ఏర్పాటు చేసిన మంత్రుల బృందానికి (జీవోఎం) సమర్పించే నివేదిక రూపకల్పన, మార్పు చేర్పులపై పార్టీ సీనియర్లు కె.కేశవరావు, కె.వి.రమణాచారి, ఎ.కె.గోయల్‌తో కేసీఆర్ సమావేశమయ్యారు.

 

హైదరాబాద్‌లో శాంతిభద్రతలపై కిరికిరి పెట్టాలనే ఆలోచనలో కేంద్రం ఉన్నట్లు వార్తలు వస్తున్నాయని, ప్రధానమైన ఈ అంశంలో ఎలాంటి ఆంక్షలను అంగీకరించకూడదని కేసీఆర్ స్పష్టం చేశారు. దేశంలో 28 రాష్ట్రాలు ఏర్పాటైనప్పుడు ఎలాంటి నిర్ణయాలు జరిగాయో, తెలంగాణ విషయంలోనూ అలాంటి విధానమే ఉండాలన్న అంశం నివేదికలో పొందుపర్చాలని ఆయన సూచించారు. దీన్నే టీఆర్‌ఎస్ వైఖరిగా జీవోఎంకు స్పష్టంగా చెప్పాలన్నారు.

 

 

హైదరాబాద్ శాంతిభద్రతలపై రాజీపడితే భావితరాలు క్షమించవని, టీఆర్‌ఎస్‌ను ద్రోహిగా చరిత్రలో నిలబెట్టే ప్రయత్నాలు జరుగుతాయని ఈ సందర్భంగా కేసీఆర్ వ్యాఖ్యానించారు. తెలంగాణ రాష్ట్ర ఏర్పాటుకు సంబంధించి 11 అంశాలపై టీఆర్‌ఎస్ వైఖరిని పేర్కొంటూ నివేదికను పార్టీ నేతలు రూపొందించారు. దీనికి తుదిమెరుగులు దిద్దడం పూర్తవుతుందని టీఆర్‌ఎస్ వర్గాలు తెలిపాయి. ఈ సమావేశంలో పార్టీ నేతలు ఈటెల రాజేందర్, కేటీఆర్, జి. జగదీశ్‌రెడ్డి, సుభాష్ రెడ్డి తదితరులు పాల్గొన్నారు.