బొత్స సీఎం పదవి కోసం... కిరణ్ ఉన్నదాన్ని కాపాడుకోవడం కోసం

Posted: 08/26/2013 09:08 AM IST

కేంద్ర మంత్రి కిషోర్ చంద్రదేవ్ రాష్ట్ర ముఖ్యమంత్రి, పీసీసీ బొత్స సత్యనారాయణల పై సంచలన వ్యాఖ్యలు చేశారు. పనిలో పనిగా మాజీ రాష్ట్ర వ్యవహారాల ఇంచార్జి గులాంనబీ ఆజాద్ తీరు పై కూడా ఆయన మండిపడ్డారు. ఐసిసి అధినేత్రి సోనియాగాంధీకి ఆరుపేజీల లేఖాస్త్రాన్ని సంధిస్తూ పలు విషయాలు ప్రస్తావించాడు. గతంలో నుండే బొత్స, కిషోర్ లకు విభేదాలు ఉన్నాయని తెలిసిందే. అవి మళ్లీ ఇప్పుడు మరోసారి బయటపడ్డాయి. సోనియాకు రాసిన లేఖలో తెలంగాణ అంశం గురించి, బొత్స, సీఎంల గురించి ప్రస్తావించడం విశేషం. రాష్ట్రాన్ని విభజిస్తే మూడు రాష్ట్రాలుగా విభజించి, హైదరాబాద్ ని యూటీ చేయాలని అంటూనే... 2014 దాకా ముఖ్యమంత్రిగా కొనసాగేందుకు కిరణ్‌కుమార్‌రెడ్డి యత్నిస్తున్నారని ఆయన పేర్కొన్నారు. అదే విధంగా సీమాంధ్ర రాష్ట్రం ఏర్పడితే ముఖ్యమంత్రి కావాలనే యోచనలో పిసిసి అధ్యక్షుడు బొత్స సత్యనారాయణ వున్నార ని, బొత్స పైకి సమైక్య రాష్ట్రం కోరుకుంటున్న లోపల మాత్రం ప్రత్యేకవాదానికి మద్దతు ఇస్తున్నాడని ఆయన అన్నారు. 

తెలంగాణ వాదులతో పాటు ముఖ్యమంత్రి ఎన్‌.కిరణ్‌కుమార్‌ రెడ్డి, పీసీసీ అధ్యక్షుడు బొత్స సత్యనారాయణలతో చర్చలు జరిపితే సరిపోతుందా ? అన్ని ప్రాంతాల అభిప్రాయాలు సేకరించిన తరువాతనే వర్కింగ్ కమిటీ నిర్ణయం తీసుకోవాల్సిందని ఆయన ఆ లేఖలో అభిప్రాయ పడ్డారు. ఇక్కడ విశేషం ఏంటంటే... కిషోర్ చంద్రదేవ్, బొత్సలు విజయనగరం జిల్లాకు చెందిన వారే. తెలంగాణ ఇవ్వడమే బెటర్ అని అజాద్ ఇచ్చిన నివేదిక ఫలితంగానే ఈ పరిణామాలు జరిగాయన్నది కాంగ్రెస్ వర్గాలలో ఉన్న ప్రచారం. దానికి అనుగుణంగా కిషోర్ వ్యాఖ్యలు చేయడం మరింత ఆసక్తిని కలిగిస్తుంది.