నమ్మం గాక నమ్మం అంటున్న వెంకయ్య

Posted: 07/02/2013 04:03 PM IST

చీర పోయినా రంగు మాత్రం పోదు గ్యారెంటీ అన్నట్టుంది భాజపా నేత వెంకయ్యనాయుడు మాటలు అంటూ రాజకీయ విశ్లేషకులు విమర్శిస్తున్నారు.   

రాబోయే ఎన్నికల తయారీలకు ఈ సారి దొరికినంత సమయం రాజకీయ పార్టీలకు ఎప్పుడూ దొరికుండదు.  సంవత్సరం క్రితం నుంచే ఎన్నికలమీద కన్ను వేసి వ్యవహరిస్తున్న రాజకీయ పార్టీలకు ఎప్పటికప్పుడు వ్యాఖ్యానాలను చెయ్యటానికి అప్రమత్తంగా ఉంటూ నడుచుకోవలసి వస్తోంది.

ఈమధ్య కాలంలో తెలంగాణా మీద మల్లగుల్లాలు పడుతున్న కాంగ్రెస్ పార్టీ పెద్ద తలకాయలను, వారి సిబ్బంది నుంచి వచ్చే వార్తలను వింటుంటే ఏమో నిజంగా ఈసారి కాంగ్రెస్ పార్టీ తెలంగాణా రాష్ట్ర ఏర్పాటుకి సై అంటుందేమో అనే అనుమానం అందరికీ వస్తోంది. 

మొన్నటి వరకూ తెలంగాణా ఇక మేము ఇవ్వాల్సిందే కానీ కాంగ్రెస్ వశంలో లేదు.  మమ్మల్ని గెలిపించండి 10 రోజుల్లో తెలంగాణా తీసుకోండి అంటూ తెలంగాణా ప్రజలకు ఆఫర్లిచ్చిన భాజపా ఎందుకైనా మంచిదని ఆంధ్రా ప్రాంతంలో కూడా పర్యటిస్తూ ప్రచారాలను చేస్తోంది.  అందులో భాగంగా తిరుపతిలో మాట్లాడుతూ భాజపా రాష్ట్ర అధ్యక్షుడు కిషన్ రెడ్డి తెలుగువారికి రెండు రాష్ట్రాలుంటే నష్టమేమిటంటూ మాట్లాడారు. 

భాజపా సీనియర్ నాయకుడు వెంకయ్యనాయుడు అదే తిరుపతిలో మాట్లాడుతూ, తెలంగాణా మీద త్వరలో నిర్ణయం జరుగుతుందంటూ చెప్తున్న దిగ్విజయ్ సింగ్ కూడా మిగతావాళ్ళ లాగానే పాత కథలే వినిపిస్తున్నారంటూ ఆరోపిస్తూ, అంతటితో ఆగక, ఒకవేళ కాంగ్రెస్ పార్టీ తెలంగాణా ఇచ్చినా ప్రజలు నమ్మరంటూ వ్యాఖ్యానించి అందరినీ అబ్బురపరచారు.

ఒక నిర్ణయం తీసుకుంటామనే మాటను మేము నమ్మం అని అనటంలో అర్థముంది కానీ ఆ నిర్ణయం తీసుకున్నా నమ్మబోమని అనటంలో అంతరార్థమేమిటా అని రాజకీయాల్లో ఆసక్తిగలవాళ్ళు కొందరు అనుకుంటున్నారు. 

-శ్రీజ