తల్లడిల్లిన తల్లి హృదయం

Posted: 07/02/2013 02:28 PM IST

చంచల్ గుడా జైల్లో విలాసాలకు చోటుచేసుకుంటున్నట్టుగా వస్తున్న వ్యాఖ్యలపట్ల వైయస్ ఆర్ కాంగ్రెస్ అధ్యక్షుడు వైయస్ జగన్ తల్లి, పార్టీ గౌరవ అధ్యక్షురాలు వైయస్ విజయమ్మ మనస్తాపానికి గురయ్యారు.  అవన్నీ అనుచిత వ్యాఖ్యలంటూ మండిపడ్డారు.

జైల్లో డ్రగ్స్, నీలి చిత్రాలను చూస్తున్నారంటూ తెదేపా అధ్యక్షుడు చేసిన వ్యాఖ్యలు నిరాధారమైనవంటూ చెప్పటమే కాకుండా, జైల్లో ప్రత్యేకంగా అమర్చిన సిసి కేమెరాల విషయాన్ని గుర్తు చెయ్యటమే కాకుండా, తన కుమారుడికి అటువంటి అలవాట్లు లేవని, తమ పెంపకంలో లోపమేమీ లేదని చెప్తూ విజయమ్మ ఆవేదనకు గురయ్యారు.

ఇంటి నుంచి భోజనం తీసుకెళ్ళటానికి కూడా వీలుకాని పరిస్థితి అక్కడ నెలకొనివుంటే, మీరు దాన్ని విలాసాలని అంటారా అంటూ విజయమ్మ ప్రశ్నించారు.  తన కుటుంబంలో ని సభ్యుల మీద కత్తిగట్టి తన భర్త దివంగత నేత రాజశేఖరరెడ్డి, కుమారుడు జగన్, కుమార్తె షర్మిల, కోడలు భారతి మీద దుష్ప్రచారాలు చేస్తున్నారంటూ ఆమె తన ఆక్రోశాన్ని వెళ్ళగక్కారు. 

కుటుంబానికి దూరంగా జైల్లో మగ్గుతున్న తన కుమారుడి గురించి అభాండాలు వెయ్యటమే రాజకీయమా అంటూ విజయమ్మ కోపంగా ప్రశ్నించారు.  జైల్లో మరో ఇద్దరితో కలిసి జైలు గదిని టాయ్ లెట్ ని పంచుకుంటూ ఒక మంచం ఒక టేబుల్ మాత్రమే వాడుకోవటానికి ఇచ్చిన జైలు జీవితం విలావంతం అవుతుందా అన్నారామె.

-శ్రీజ