తెలుగు దంపతులపై జాలి చూపని నార్వే ప్రభుత్వం?

Posted: 06/11/2013 06:26 PM IST

ఆరు నెలలు గా నార్వేలో శిక్ష అనుభవిస్తున్న తెలుగు దంపతులు. కొడుకును హింసించిన నేరానికి నార్వేలో శిక్ష అనుభవిస్తున్న తెలుగు దంపతులు చంద్రశేఖర్, అనుపమలు శిక్ష అనుభవించాల్సిందేనని నార్వే ప్రభుత్వం స్పష్టం చేసింది.కన్నకొడుకును మందలించారన్న కేసులో జైలు శిక్ష అనుభవిస్తున్న రాష్ట్రానికి చెందిన చంద్రశేఖర్, అనుపమ దంపతులను ఆదుకోవాలన్న ప్రభుత్వ ప్రయత్నాలు బెడిసికొట్టాయి. చంద్రశేఖర్ దంపతులను జైలు నుంచి విడుదల చేయటం సాధ్యం కాదని నార్వే ప్రభుత్వం స్పష్టం చేసింది. ఈ విషయాన్ని స్పష్టం చేస్తూ రాష్ట్ర ప్రభుత్వానికి నార్వే ప్రభుత్వం అధికారికంగా లేఖ పంపింది. కుమారుడు సాయిశ్రీరామ్‌ను దండించిన ఆరోపణలపై ఓస్లో జిల్లా కోర్టు చంద్రశేఖర్‌కు 18 నెలలు, అనుపమకు 15 నెలలు శిక్ష విధించిన విషయం తెలిసిందే. చంద్రశేఖర్‌ దంపతులు జైలుకెళ్లడంతో వారి పిల్లలైన సాయిశ్రీరామ్‌, అభిరామ్‌ మనోవేదనకు గురవతున్నారని, వారికి తల్లిదండ్రుల అవసరముందని మన రాష్ట్ర ప్రభుత్వం గతంలో నార్వే ప్రభుత్వానికి లేఖ రాసింది. చంద్రశేఖర్‌, అనుపమకు శిక్ష నుంచి విముక్తి ప్రసాదించాలని కోరింది. ఆ విజ్ఞప్తిపై స్పందిస్తూ నార్వే దేశంలో చట్టాలు మార్చటం కుదరదని, కుమారుడిని దండించినందుకు శిక్ష అనుభవించాల్సిందేనని స్పష్టం చేస్తూ నార్వే ప్రభుత్వం తాజాగా రాష్ట్ర సర్కార్‌కు లేఖ పంపింది.