రాజీనామాకు సిద్దపడ్డ శ్రీనివాసన్ ?

Posted: 06/01/2013 04:50 PM IST

స్పాట్ ఫిక్సింగ్ ఆరోపణల కింద చెన్నై ఫ్రాంఛైజీ కి సంబంధించిన సభ్యుడు, బీసీసీఐ అధ్యక్షుడు శ్రీనివాసన్ అల్లుడు అయిన గురునాథన్ మయ్యప్పన్ అరెస్టు కావడంతో బీసీసీఐ పదవికి శ్రీనివాసన్ రాజీనామా చేయాల్సిందేనని ఒత్తిడి పెరుగుతున్న విషయం తెలిసిందే. అయితే ఇన్ని రోజుల నుండి రాజీనామా చేయకుండా ఉన్న శ్రీనివాసన్ నేడు కాస్తంత బెట్టువీటి కాళ్ల బేరానికి వచ్చినట్లు తెలుస్తుంది. అన్ని వైపుల నుండి తీవ్ర ఒత్తిడి రావడంతో ఈనెల 8వ తేదీన నిర్వహించాల్సిన బీసీసీఐ వర్కింగ్ కమిటీ సమావేశాన్ని రేపు అత్యవసరంగా ఏర్పాటు చేయబోతున్నారు. ఈ సమావేశంలో శ్రీనివాసన్ తన రాజీనామాను ప్రకటించే అవకాశాలు ఉన్నాయని అంటున్నారు. రేపు ఉదయం 11 గంటలకు చెన్నైలో బిసిసిఐ వర్కింగ్ కమిటీ అత్యవసర సమావేశం జరుగుతుందని బిసిసిఐ గేమ్ గేమ్ డెవలప్‌మెంట్ మేనేజర్ రత్నాకర్ శెట్టి చెప్పారు. స్పాట్ ఫిక్సింగ్ పై దర్యాప్తు పూర్తయ్యే వరకూ శ్రీనివాసన్ అధ్యక్ష పదవికి దూరంగా ఉండడం లేదా పూర్తిగా రాజీనామా చేసే అవకాశాలు ఉన్నాయని సమాచారం. రేపటి సమావేశం అనంతరం ముఖ్యమైన ప్రకటన వెలువడుతుందని రాజీవ్ శుక్లా చెప్పారు. అరుణ్ జైట్లీ అధ్యక్ష బాధ్యతలు చేపట్టడానికి అవకాశాలున్నాయని తెలుస్తోంది.   వచ్చే 24 గంటల్లో విశేషమైన పరిణామం చోటు చేసుకుంటుందని బిసిసిఐ ఉపాధ్యక్షుడు అరుణ్ జైట్లీ, సంయుక్త కార్యదర్శి అనురాగ్ ఠాకూర్ చెప్పిన కొద్ది గంటలకే అత్యవసర సమావేశం ఏర్పాటు పై నిర్ణయం తీసుకోవడం విశేషం.