విదేశీ పర్యటన ముఖ్యమా..

Posted: 05/29/2013 11:54 AM IST

కేంద్రమంత్రి హోంశాఖ మంత్రి సుశీల్ కుమార్ షిండే కు దెబ్బ మీద దెబ్బ తగులుతుంది. ఆయన చేసే తొందరపాటు చర్యల వల్ల కొన్ని చిక్కులు కొని తెచ్చుకుంటున్నారు. రీసెంట్ గా చత్తీస్‌గఢ్‌లో మావోయిస్టులు కాంగ్రెస్ పార్టీ నేతలను దారుణంగా హతమార్చిన తర్వాత ఆంతరంగక భద్రతఅంశంపై ప్రభుత్వం తలమునకలై ఉన్న తరుణంలో కేంద్ర హోమ్ మంత్రి సుశీల్ కుమార్ షిండే తన అమెరికా పర్యటనను పొడిగించుకోవడాన్ని కాంగ్రెస్ పార్టీ తప్పుపట్టింది. దేశంలో ఇలాంటి పరిస్థితి తలెత్తినప్పటికీ హోం మంత్రి షిండే అమెరికాలో ఉండడంపై కాంగ్రెస్ పార్టీ మండిపడుతుంది. ‘ఇలాంటి పరిస్థితిలో ఏ పర్యటన కూడా ముఖ్యం కాదు’ అని కాంగ్రెస్ పార్టీ అధికార ప్రతినిధి భక్తచరణ్ దాస్ అన్నారు.

అయితే ప్రధాని మన్మోహన్ సింగ్ స్వయంగా చత్తీస్‌గఢ్ సందర్శించినందున, హోం శాఖ సహాయ మంత్రి ఆర్‌పిఎన్ సింగ్ చేతిలో పూర్తి అధికారాలున్నందున హోం మంత్రి లేక పోవడాన్ని రాజకీయ అంశం చేయాల్సిన అవసరం ఎంతమాత్రం లేదని కూడా ఆయన అన్నారు. భారత్, అమెరికాల మధ్య ఆంతరంగిక భద్రతపై జరిగే చర్చల్లో పాల్గొనడం కోసం ఈ నెల 19న అమెరికా బయల్దేరి వెళ్లిన షిండే తన పర్యటనను కుదించుకోవడం లేదని, ముందు నిర్ణయించుకున్న ప్రకారం బుధవారం స్వదేశం తిరిగి వస్తున్నారని వార్తలు వచ్చాయి.

షిండే తప్ప ఈ నెల 20నుంచి 22వ తేదీ వరకు జరిగిన ఈ చర్చల్లో పాల్గొనడానికి వెళ్లిన భారత ప్రతినిధి బృందంలోని మిగతా సభ్యులందరూ ఇప్పటికే తిరిగి వచ్చేసారు. అయితే పాల్గొనాల్సిన అధికారిక కార్యక్రమాలు ఏవీ లేనప్పటికీ షిండే వ్యక్తిగత అవసరాలకోసం 22 తర్వాత కూడా అమెరికాలోనే ఉండిపోయారు. గత శనివారం జరిగిన నక్సల్స్ దాడి ఘటనపై తాను ఆ రాష్ట్ర ముఖ్యమంథ్రి రమణ్ సింగ్‌తో మాట్లాడానని, ఈ సంఘటనపై దర్యాప్తును జాతీయ భద్రతా ఏజన్సీ(ఎన్‌ఐఏ)కు అప్పగిస్తున్నట్లు షిండే ప్రకటించడం తెలిసిందే.