Posted: 03/27/2013 05:50 PM IST

ఢిల్లీ నగర వాసుల పద్ధతే వేరు.  భారత దేశంలోని నాలుగు ముఖ్య నగరాలలో పశ్చిమంలో ముంబై ముఖ్య వ్యాపార కేంద్రంగానూ, ఉత్తరం లోని కోలకతా భారీ ఉత్పత్తులకు ప్రసిద్ధికెక్కగా, దక్షిణంలోని చెన్నై కళలు, వ్యాపారాలకు, దక్షిణ భారత సినీ పరిశ్రమకు పేరుగాంచగా, ఉత్తరంలోని ఢిల్లీ దేశరాజధానిగా విరజిల్లటమే కాక, అక్కడి నగర వాసుల జీవన శైలి కూడా చాలా హుందాగా ఉంటుంది.  అక్కడ ప్రతివారూ మరొకరిని ఇంప్రెస్ చెయ్యటానికి చూసేవారే.

ఢిల్లీలో నగరవాసులు ఖర్చు పెట్టటంలో వెనకాడరు.  ఆహారం విషయంలో కానీ, వినోదానికి కానీ, దుస్తులలాంటి అలంకరణలలో కానీ, ఎందులో చూసుకున్నా, ఉన్నదాంట్లో బాగా ఖర్చు పెడుతూ ఖరీదైన జీవితాన్ని గడపటానికే చూస్తారు.  పండుగలు, వినోదాలు, వేడుకలకు ఉన్నవాళ్ళు చేతికి ఎముకలేదన్నట్టుగా ఖర్చు చేస్తారు.  దసరా దీపావళికి అక్కడయ్యే ఖర్చులో చాలా భాగం మిఠాయిలు, బహుమతులు ఇచ్చిపుచ్చుకునే వాటికే అవుతుంది.  అందుకే దిల్లీ హై దిల్ వాలోంకి అని పేరు పడింది.  లెక్కలు వేసుకోవటం కాకుండా హృదయానికి నచ్చే పని చేస్తారు.  అందుకు తార్కాణంగా ఈ రోజు హోలీ సందర్భంగా బంగారు పిచికారీలు అమ్ముడుపోతున్నాయంటే దాన్ని బట్టి అర్థం చేసుకోవచ్చు.

కాస్త తక్కువ స్తోమతున్నవాళ్ళు వెండి పిచికారీల మీద పడ్డారు.  బంగారు పిచికారీల వెల 80 లక్షల నుంచి మొదలౌతే, వెండి పిచికారీల వెల 50 వేల రూపాయలు.  వజ్రాలు పొదిగిన పిచికారీలు కూడా ఉన్నాయి.  హోలీ పార్టీలకు 50 లక్షల వరకూ ఖర్చు పెడుతున్నారట.  రేపటి సంగతి మనకి తెలియదు.  ఉన్నప్పుడే అనుభవిద్దాం అనుకునే మనస్తత్వం వాళ్ళది.  భోజన ప్రియులే కాక అతిథులకు కూడా బాగా తిండి పెట్టాలనే ఆచారాన్ని నమ్మేవాళ్ళు.  ప్రేమ చూపించటంలో హద్దులు పెట్టుకోరు.

అయితే, అక్కడ పంతాలు పట్టింపులు వచ్చినా అలాగే ఉంటాయి.  చచ్చిపోయేది ఒక్కసారే పైగా అది ఎలాగూ తప్పదు కాబట్టి ఇక భయపడేది దేనికి అంటారు వాళ్ళు.  గొడవపడితే ఎవరూ వెనక్కి తగ్గరు.

-శ్రీజ