Posted: 03/05/2013 11:33 AM IST

బిజెపి నరేంద్ర మోడీనే కాదు, వాళ్ల తాతవచ్చినా ఆ పార్టీకి ఒరిగేదేమీ లేదని సిపిఐ రాష్ట్ర కార్యదర్శి డాక్టర్ కె. నారాయణ అన్నారు. పది రోజులపాటు రష్యాలో పర్యటించి వచ్చిన నారాయణ అన్నారు. రష్యాలో కమ్యూనిస్టు పార్టీ మహాసభలు ఘనంగా జరిగాయని అన్నారు. కమ్యూనిస్టు పార్టీ పాలన పునరుద్ధరణకు కావల్సిన చర్చలు జరిగాయని అందుకు కృషి జరుగుతోందని పేర్కొన్నారు.బాబ్లీ ప్రాజెక్టు వివాదం జరుగుతోందని, సుప్రీంకోర్టు తీర్పు రానే వచ్చిందని, బాబ్లీ ప్రాజెక్టు పూర్తి చేస్తే జూన్, జూలైలో రావల్సిన నీరు రాదని ఇంతకాలం భయపడుతూ వచ్చామని, బాబ్లీ నిర్మాణం సాగించి నిండిన తర్వాత సెప్టెంబర్‌లో నీళ్లు వదిలితే పంట అదునుకు ఉపయోగపడదని అనుకున్నామని, జూన్ నుండి సెప్టెంబర్ వరకూ గేట్లు మూయవేయరాదని సుప్రీం చెప్పడం వల్ల మనకు నష్టం లేదని అన్నారు. సుప్రీం ఆదేశాలను ఉల్లంఘిస్తే ఎలాంటి చర్యలు ఉండాలో కూడా స్పష్టంగా మాట్లాడుకోవాలని నారాయణ పేర్కొన్నారు.

ప్రధాన మంత్రి వద్దకు వెళ్లి రాష్ట్ర అఖిలపక్షం నుండి ఒక నమ్మకాన్ని కల్పించుకోకపోతే భయం వేస్తోందని, రాబోయే రోజుల్లో వాళ్లు గేట్లు తెరవకపోతే, మనకు నష్టం వస్తుందనే అనుమానం ఉందని అన్నారు.  పోలవరం ప్రాజెక్టు వ్యవహారం అత్యంత వివాదాస్పదంగా మారిందని, జలయజ్ఞం యమగండంతో ప్రారంభం అయిందని, ఇన్నాళ్లు కాలయాపన చేయడం వల్ల అంచనాలు నాలుగు రెట్లు పెరిగిపోయాయని చెప్పారు. పోలవరం అవినీతి సమస్య, జలయజ్ఞం అవినీతి సమస్య రష్యా, బీజింగ్, చైనాల్లో చర్చలు జరగడం, అధికారుల లాబీయింగ్, ఎంబాసీల్లో మాట్లాడటం వంటి స్థాయికి ఎదిగి ప్రజల గౌరవం దిగజారిపోయిందని అన్నారు. సాంకేతిక నిపుణుల నాటకమే తప్ప ఇంత ప్రాజెక్టు ఎంత లేదన్నా రాజకీయ నిర్ణయంగానే చెప్పవచ్చని నారాయణ పేర్కొన్నారు.