Posted: 02/05/2013 06:53 PM IST

హస్తినలో గత కొద్దిరోజులుగా తెలంగాణ అంశం పై జోరుగా చర్చల మీద చర్చలు సాగిస్తున్న అధిష్టానం తెలంగాణ పై త్వరలో ఓ స్పష్టమైన ప్రకటన చేయవచ్చనే సమాచారం జాతీయ మీడియాలో కథనాలు వస్తున్నాయి. అంతక ముందు వివిధ ప్రాంత నేతలతో భేటీలు జరిపిన కాంగ్రెస్ కోర్ కమిటీ పెద్దలు కూడా సోనియాకి నివేదిక ఇవ్వనున్నారు. ఇక తాజాగా మన రాష్ట్ర ముఖ్యమంత్రిని ఢిల్లీకి పిలిపించుకున్న అధిష్టానం ఆయనతో జోరుగా చర్చలు జరిపింది. ఈ నెల 9వ తేదీన గవర్నర్ నరసింహన్ ని కూడా రమ్మని ఫోన్ చేసింది. త్వరలో పీసీసీ అధ్యక్షుడు బొత్స సత్యనారాయణను కూడా పలిచి తాజా, జరగబోయే పరిణామాల గురించి చర్చించనున్నట్లు సమాచారం. వీరందరి దగ్గరి నుండి సమాచారం తీసుకున్న తరువాత కాంగ్రెస్ అధిష్టానం తెలంగాణకు ప్రాంతీయ అభివృద్ధి మండలి వైపే మొగ్గు చూపేందుకు ఆసక్తిగా ఉన్నట్లు మీడియాలో కథనాలు వస్తున్నాయి.

ప్రాంతీయ మండలికి భారీగా నిధులు ఇచ్చే అవకాశాలు ఉన్నట్లుగా చెబుతున్నారు. ఈ విషయమై చర్చించేందుకు మూడు ప్రాంతాల ముఖ్య నేతలతోనూ అధిష్టానం భేటీ కానుందని అంటున్నారు. మూడు ప్రాంతాల కాంగ్రెసు పార్టీ ముఖ్య నేతలతో భేటీ అనంతరం అధిష్టానం కేంద్రం ద్వారా తెలంగాణకు ప్రాంతీయ అభివృద్ధి మండలి ఏర్పాటు చేస్తున్నట్లు ప్రకటించే అవకాశాలు ఉన్నాయనే వాదనలు వినిపిస్తున్నాయి. కాగా ముఖ్యమంత్రి కిరణ్ కుమార్ రెడ్డి ప్రధాని మన్మోహన్ సింగ్ తో భేటీ అయ్యారు.తెలంగాణ ఇవ్వడం వల్ల , ఇవ్వకపోవడం వల్ల వచ్చే రాజకీయ పరిణామాలు, అలాగే రాష్ట్రంలోను, దేశవ్యాప్తంగా ఎదురయ్యే సమస్యలు మొదలైనవాటిపై కాంగ్రెస్ అధిష్టానం పూర్తి స్థాయిలో చర్చిస్తున్నట్లు చెబుతున్నారు.

మీడియాలో వస్తున్న సమాచారం ప్రకారం  మొదట ప్రాంతీయ అభివృద్ధి మండలిని ప్రకటించి, ఆ తర్వాత క్రమంగా తెలంగాణపై స్పష్టమైన నిర్ణయాన్ని తీసుకునే దిశలో వెళ్లనుందని అంటున్నారు. మరి అధిష్థానం నిర్ణయంతో తెలంగాణ కాంగ్రెస్ నాయకులు, తెలంగాణ వాదులు ఏకీభవిస్తారో లేదో చూడాలి.