Posted: 12/11/2012 10:21 AM IST

బీజేపీ పార్టీ నుండి బయటకు వచ్చి ‘కర్ణాటక జనతా పార్టీ ’ అనే సొంత కుంపటి పెట్టుకున్న  మాజీ ముఖ్యమంత్రి బియస్ యడ్యూరప్ప అధిష్టానానికి కొరకరాని కొయ్యగా మారిన విషయం తెలిసిందే. అయితే ఆయన అధిష్టానం చెక్ పెట్టేందుకు పావులు కదుపుతుందా ? అంటే అవుననే అంటున్నాయి కర్ణాటక రాజకీయ వర్గాలు. ప్రస్తుతం అధికార పార్టీకి చెందిన 15 ఎమ్మెల్యేలు, ఓ నలుగురు ఎంపీలు యడ్డీ పార్టీకి మద్దతు ఇస్తున్నారు. దీంతో ప్రభుత్వం మైనార్టీలో పడింది. దీంతో యడ్డీకి చెక్ పెట్టాలనే ఉద్దేశ్యంతో  అసెంబ్లీని రద్దు చేసి, నిర్ణీత గడువు కన్నా ముందే ఎన్నికలకు వెళ్లాలని యోచిస్తున్నట్లు సమాచారం.  ఇక ఇదే సమయంలో అదేసమయంలో యడ్యూరప్ప కొత్త పార్టీ ప్రారంభోత్సవ కార్యక్రమంలో పాల్గొన్న 15 మంది ఎంపీలపై చర్య తీసుకునే దిశగా కమలనాథులు చర్యలు చేపట్టారు.

ఇదే అంశంపై సోమవారం సమావేశమై చర్చించి, కీలక నిర్ణయం తీసుకున్నట్టు సమాచారం. ఒక విధంగా చెప్పాలంటే యడ్యూరప్ప హవేరీ బహిరంగ సభ తన బలాన్ని చూపించినట్టుగా మారింది. సభా వేదికపై అధికార పార్టీకి చెందిన 15 మంది ఎమ్మెల్యేలు పాల్గొన్నారు. మరికొందరు ఎమ్మెల్యేలు, మంత్రులు, ఎంపీలు ఆయనకు మద్దతుగా అక్కడే ఉన్నప్పటికీ వేదికను అలంకరించలేదు. ఈ హంగేరి సభలో తమ దయా దాక్షిణ్యాలతోనే ప్రభుత్వం నడుస్తుందని, మేం తలుచుకుంటే ప్రభుత్వం కూలిపోతుందని,  తనకు 70మంది ఎమ్మెల్యేలు, 10 మంది ఎంపీల మద్దతు ఉందని యెడ్యూరప్ప ప్రకటించడంతో యడ్డీ మాటలు బీజేపీకి  చురకులు అంటించనట్లు అయ్యాయి., దీంతో కర్ణాటక అసెంబ్లీని రద్దు చేయాలన్న యోచనలో కమలనాథులు ఉన్నట్టు తెలుస్తోంది. మరి ముందస్తు ఎన్నికలకు వెళితే... బీజేపీ పార్టీ యడ్డీకి చెక్ పెడుతుందో లేక, యడ్డీనే బీజేపీకి చెక్ పెడతాడో చూడాలి.