Posted: 11/27/2012 03:17 PM IST

తెలంగాణలో దళితుల ఏకైక శత్రువు కేసిఆర్ ఒక్కరేనని  ఎమ్మార్పీఎస్ వ్యవస్థాపక అధ్యక్షుడు  మంద క్రిష్ణ మాదిగ పేర్కొన్నారు.  దళిత మంత్రి  గీతారెడ్డిపై  కొదండరాం చేసిన వ్యాఖ్యలను సమర్థించిన  ఆయన క్షమాపణలు చెప్పాలని , లేదంటే  ఆయన ఎక్కడ సభలు పెట్టినా అడ్డుకుంటామని  హెచ్చరించారు.  సూర్యాపేటలో ఎవరో పోటీ సభ పెడతారంటూ పరోక్షంగా  తమను ఎద్దేవా చేస్తూ  చేసిన వ్యాఖ్యలను  సవాలుగా  తీసుకుంటున్నామని  చెప్పారు.  సూర్యాపేటలో  కేసిఆర్  నిర్వహించిన  ప్రదేశంలోనే తాము ఎమ్మార్పీఎస్  సభను ఏర్పాటు చేస్తామని, దానికి కేసిఆర్ ను  పిలుస్తామని  తెలిపారు.  కేసిఆర్ వంద సామాజిక  వర్గాలతో సభను ఏర్పాటు చేశారని , తాము ఒక్క వర్గంతోనే దీటుగా సభను ఏర్పాటుచేసి దళితుల సత్తా చూపిస్తామని  తెలిపారు.  కేసిఆర్  మొదటి నుంచీ దళిత  వ్యతిరేకిగా వ్యవహరిస్తున్నారని, 2001లో పార్టీని  స్థాపించిన ఆయన సెటిల్ మెంట్ల పేరుతో  డబ్బులు  దండుకుంటున్నారని ధ్వజమెత్తారు. వర్గీకరణకు మద్దతిస్తామంటున్న క్రమంలో సూర్యాపేటలో పెట్టబోయే తమ సభకు  ముందుగా కేసిఆర్ నే ఆహ్వానిస్తానని, తప్పించుకోకుండా తప్పకుండా రావాలని కోరారు. మిగత పార్టీల నేతలనూ పిలుస్తామని చెప్పారు.  తెలంగాణ కోసం పోరాడుతున్న  వారిలో, ఆత్మ బలిదానాలు చేస్తున్న వారిలో  సభా వేదికలపై  నిర్వహించే  కళా ప్రదర్శనల్లో అధిక శాతం  మంది మాదిగలే ముందుంటున్నారని , తెలంగాణ వస్తే దళితుడినే ముఖ్యమంత్రిని చేస్తానంటున్న కేసిఆర్ వారి పేరునెందుకు ప్రకటించడం లేదని ప్రశ్నించారు. ఇటీవల పార్టీలో  చేరిన స్వామిగౌడ్ ను  ఎమ్మెల్సీ అభ్యర్థిగా ప్రకటించడమే గాకుండా తెలంగాణ వస్తే రాష్ట్ర మంత్రి అవుతారంటూ ముందే ప్రకటించిన కేసిఆర్  దళిత ముఖ్యమంత్రిని పేరుపై  ఎందుకు వెనకాడుతున్నారని  ఆయన నిలదీశారు.