Posted: 11/14/2012 01:07 PM IST

బిజెపి అధ్యక్షుడు నితిన్ గడ్కరీకి వ్యతిరేకంగా జరుగుతున్న ప్రచారం వెనుక గుజరాత్ ముఖ్యమంత్రి నరేంద్రమోడీ హస్తం ఉందంటూ ఆర్‌ఎస్‌ఎస్ సిద్ధాంతకర్త ఎంజి వైద్య తీవ్ర ఆరోపణ చేశారు. గడ్కరీకి వ్యతిరేకంగా బిజెపి నాయకుడు రామ్‌జెఠ్మలానీ చేస్తున్న డిమాండ్ల వెనుక మోడీ హస్తం ఉందని వైద్య తన బ్లాగ్‌లో ఆరోపించారు. బిజెపి అధ్యక్ష పదవినుంచి గడ్కరీ తప్పుకోవాలని, అలాగే నరేంద్రమోడీని బిజెపి ప్రధానమంత్రి అభ్యర్థిగా ప్రకటించాలంటూ జెఠ్మలానీ డిమాండ్ చేయడమే ఇందుకు నిదర్శనమని వైద్య పేర్కొన్నారు. అయితే వైద్య చేసిన ఆరోపణలతో తమకు ఎలాంటి సంబంధం లేదని అటు ఆర్‌ఎస్‌ఎస్, ఇటు బిజెపిలు స్పష్టం చేశాయి. నరేంద్రమోడీని ప్రధానమంత్రి అభ్యర్థిగా ప్రకటించాలని బిజెపి అధ్యక్ష పదవి నుంచి గడ్కరీ రాజీనామా చేయాలని ఏకకాలంలో రామ్‌జెత్మలానీ డిమాండ్ చేయడం వల్ల దీనివెనుక మోడీ ప్రమేయం ఉందన్న అనుమానం తనకు కలిగిందని వైద్య పేర్కొన్నారు. పైగా ప్రధానమంత్రిని కావాలన్న ఆకాంక్ష తనకేమాత్రం లేదని నరేంద్రమోడీ ఇంతవరకూ ఎక్కడా స్పష్టం చేయలేదని వైద్య పేర్కొన్నారు. కాగా, వైద్య వ్యక్తం చేసిన అభిప్రాయంతో గడ్కరీని వ్యతిరేకిస్తున్న వర్గం ఇరుకున పడగా, తమపై ఒకవర్గం కుట్ర పన్నిందన్న తమ అనుమానాలు నిజమని తేలుతోందని గడ్కరీ వర్గం ఖుషీగా ఉంది. సంఘ్ అధికార ప్రతినిధి హోదాలోకాక తన వ్యక్తిగత అభిప్రాయంగానే వ్యక్తం చేసినట్టు వైద్య వివరణ ఇచ్చినప్పటికీ గడ్కరీ వ్యతిరేక వర్గం ఇరుకున పడింది.

గడ్కరీ రెండోసారి అధ్యక్షుడు కావడం ఇష్టంలేని ఒకవర్గం పనిగట్టుకుని కుట్ర చేస్తోందన్న అనుమానాలు ఆరోపణలను ధృవీకరించే తీరులో వైద్య అభిప్రాయాలు ఉన్నాయి. గడ్కరీ మాదిరి మోడీ కూడా సంఘీయుడే అయినప్పటికీ, ఆయనలా విధేయుడు కాదు. మోడీ వ్యవహార శైలిపై సంఘ్ ఇప్పటికే గుర్రుగా ఉంది. ప్రధాని కావాలన్న మోడీ ఆలోచనకు మోకాలాడ్డుతోంది. లోక్‌సభ ఎన్నికల ఫలితాలు వెలువడిన తరువాతే ప్రధాన మంత్రి పదవి గురించి ఆలోచించవచ్చునని సంఘ్ స్పష్టం చేస్తోంది. గుజరాత్ విధానసభ ఎన్నికల్లో ఆయన తిరుగులేని విజయం సాధించినప్పటికీ, సంఘ్ తీసుకునే నిర్ణయంపైనే రాజకీయ భవిష్యత్ ఆధారపడి ఉంటుందన్నది జగమెరిగిన సత్యం. ఈ నేపథ్యంలో వైద్య చేసిన వ్యాఖ్యలు పార్టీలో సమీకరణల మార్పుకు దారి తీసే అవకాశాలున్నాయి. మరోపక్క వైద్య చేసిన ప్రకటనతో తమకు ఎలాంటి సంబంధంలేదని ఆర్‌ఎస్‌ఎస్ అధికార ప్రతినిధి రామ్‌మాధవ్ స్పష్టం చేశారు. చివరకు వివాదాలకు కేంద్రబిందువుగా నిలిచిన గడ్కరీ స్వయంగా ఒక ప్రకటనలో గుజరాత్ ముఖ్యమంత్రి మోడీకి తన పూర్తి మద్దతు ప్రకటించారు. గుజరాత్‌లో పార్టీ విజయం కోసం తామంతా సమైక్యంగా పని చేస్తున్నామనీ యావత్ పార్టీ మోడీకి కొండంత అండగా నిలబడుతోందని ప్రకటించారు. గడ్కరీ ఈమేరకు చేసిన ప్రకటనను పార్టీ అధికార ప్రతినిధి రవిశంకర్ ప్రసాద్ మీడియాకు విడుదల చేశారు.